OÉ-CUSSE, 12 jullu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), nomea Silvestre Sila Teme nu’udar Xefe Departamentu Rejionál Transporte Terrestre iha Diresaun Rejionál Infraestrutura, hodi troka Domingos de Almeida.
Agência Tatoli asesu karta ezonerasaun ne’e ho númeru ofísiu 12/2022/IV/PA/RAEOA no ZEESM-TL, ho despaxu númeru 09/V/2022/PA/RAEOA no ZEESM-TL, hodi nomea, Silvestre Sila Teme, ba kargu nu’udar Xefe Departamentu Rejionál Transporte Terrestre no Komunikasaun, hodi troka Xefe Departamentu sesante, Domingos de Almeida.
Nomeasaun ne’e ho baze legál artigu 40 alinea b, no Dekretu-Lei númeru 5/2015, 22 janeiru, aprovasaun estatutu RAEOA nian.
Nune’e hafoin hala’o kna’ar kuaze seman rua ona, Silvestre Sila Teme, kompromete sei serbisu hamutuk funsionáriu públiku sira iha Diresaun Rejionál Infraestrutura, liuliu Departamentu Transporte, Terrestre no Komunikasaun, hodi hasa’e prestasaun serbisu ba atendimentu públiku nian.
“Ha’u hanesan funsionáriu públiku atu serbí, no kontribui liuhosi sei serbisu hamutuk ho diresaun hodi kumpri orientasaun autoridade nian, kona-bá hasa’e prestasaun serbisu iha instituisaun Estadu ne’e iha Oé-Cusse,” Silvestre Sila Teme, ko’alia iha Oé-Cusse, tersa ne’e.
Prioridade ne’ebé maka atu halo, dahuluk sei tau importánsia ba atendimentu, tanba DRTT kada fulan no tinan kontribui reseita ba kofre Estadu, entaun atendimentu ba komunidade tenke di’ak.
“Dokumentu ba transporte karreta no motorizada maioria sei ilegál hela, tanba balu hatama kedas dezde 2000 to’o agora laiha legalidade, entaun bazea lei ita labele rejista, maibé iha ha’u-nia mandatu sei buka solusaun, ha’u hato’o ona ba Prezidente Autoridade atu komunika ho Primeiru Ministru hodi kria rezolusaun ida, ba ema sira-ne’ebé dokuemtu laiha karik sira bele sosa de’it iha Oé-Cusse, nune’e bele kontribui reseita ba kofre Estadu,” nia promete.
Razaun tanba, durante ne’e nia parte rona ona preokupasaun barak hosi komunidade, katak maioria transporte barak mak importa iha tinan 2000 laiha dokumentu, entaun afeta bainhira hetan pasa-revista hosi parte tránzitu.
Nune’e nia agradese ba xefe departementu sesante, ne’ebé hala’o nia kna’ar iha tinan barak, tan ne’e nia parte sei kolabora hamutuk hodi lori instituisaun públiku kontinua ba oin.
Entretantu, ho asuntu ne’e, jornalista Agência Tatoli tenta atu konfirma ho diretór sesante, Domingos de Almeida, maibé laiha fatin tanba daudaun ne’e hala’o hela serbisu iha Dili.
Jornalista : Abílio Elo Nini
Editór : Evaristo Soares Martins
