DILI,11 janeiru 2023 (TATOLI) — Ministériu Saúde rekoñese menus kontrolu ba farmasia privada sira iha Timor-Leste tanba problema ho sistema, Xefe Departamentu Jestaun Autorizasaun no Introdusaun Medikamentu hosi Diresaun Nasionál Farmasia no Medikamentu, Teodoro de Jesus subliña.
“Ami rekoñese katak ho kontrolu ne’ebé ladún másimu mak iha merkadu no kioske sira faan ai-moruk, entaun ida ne’e ba oin, ami koko hadi’a atu bele kontrola di´ak liután, atu ai-moruk ne´ebé laiha kualidade labele afeta ba ema nia saúde”, Teodoro de Jesus, afirma iha edifisiu TATOLI.IP, Farol, ohin.
Nia akresenta, tinan ne’e MS tau ona planu atu bele kontrolu másimu liután tanba la´os Diresaun Nasionál Farmasia no Medikamentu (DNFM) mesak kontrola maibé ho autoridade sira hanesan Polísia Nasionál Timor-Leste, inspetór saúde mak bele kontrolu efetivu liután liuliu ba iha atividade lisensiamentu nian.
“Ami iha ona planu atu halo maneira sira ne’e, para bele husu autoridade sira tuun ba kontrolu bainhira sira la iha lisensa mak MS tenke atua ativiadade sira ne’ebé iha, atu bele prevene katak bainhira halo atividade farmasia nian tenke iha lisensa”, nia adianta.
Tuir nia, ai-moruk herbal balun mós seidauk rejistu iha MS hanesan K-link ho HWI ne´ebé halo operasaun tinan naruk ona maibé nia laiha lisensa operasionál husi MS no nia la rejistu produtu ne’ebé nia fa’an.
“Entaun produtu sira ne’e mai konsidera ilegál hela entermus sistema rejistu sira la iha, lisensa operasionál no la iha koñesimentu husi MS, katak produtu sira ne’e ofisiál rejistu iha MS, entaun DNFM labele asegura ka garante nia kualidade ne’ebé hatama mai iha ita nia rain”, esplika.
Nia rekorda, iha fulan hira ba kotuk K-link nia ai-moruk tama mai alfándega prende iha fronteira to´o ohin loron sira seidauk bele foti tanba sira seidauk hetan lisensa iha MS depois sira rejistu no hetan tiha lisensa ba produtu mak bele hasai husi fronteira.
Bainhira sira la tuir orientasaun husi MS mak sei hetan sansaun tuir lei 12/2004, sansaun mínimu kada item ida $1500 no másimu $5000 .
Diresaun Nasionál Farmasia no Medikamentu (DNFM) nia papél informa ba parte jurídiku ka guia inspetór saúde atu sira halo fiskalizasaun hodi fó sansaun tuir regra ne’ebé aplika ba ema sira ne’ebé mak la tuir regra.
Jornalista : Felicidade Ximenes
Editór : Zezito Silva
