DILI, 16 janeiru 2023 (TATOLI)—Vise Ministru Negósiu Estranjeiru no Kooperasaun (MENK), Julião da Silva, informa to’o daudaun ne’e seida’uk simu resposta hosi Ministru Negósiu Estranjeiru no Kooperasaun (MNEK) Portugál ba akordu bilaterál hodi fasilita timoroan ba servisu iha Portugál.
Notísia Relevante: Timor-Leste sei submete akordu mobilidade ba Portugál
“Kona-ba memorandum espesífiku liu atu oinsá mak bele akumula timoroan sira-ne’ebé agora dadaun iha ne’ebá ona. Memorandum ne’e ita hahú ona tinan kotuk ho Governu Portugál, soké to’o agora MNEK entermu tékniku sira seidauk simu fali karta resposta ruma hosi MNEK Portugál ninian,” Julião da Silva hateten liuhosi reuniaun plenária Parlamentu Nasionál, segunda ne’e.
Iha parte seluk, nia mós atualiza prosesu diskusaun ne’ebé hahú ona iha tinan kotuk hosi MNEK Timor-Leste Estadu Membru Nasaun Ko’alia Lian Portugés (CPLP, silgá portugés) sira liu-liu kona-ba mobilidade, ida-ne’e pretende timoroan sira bele hela livre iha nasaun sira CPLP ninian.
Iha tinan kotuk, Governu hamosu dekretu-lei ida ba repatriasaun nian ne’ebé responsavél hosi Sekretária Estadu Komunidade Timoroan iha Exteriór, servisu hamutuk ho IOM, organizasaun umanitária iha Portugál hodi haree repatriasaun timoroan ne’ebé imigrante hela iha Portugál maibé timoroan sira balun hakarak hela nafatin iha ne’eba hodi trata dokumentu lala’is atu sai sidadaun portugés.
“Agora daudaun MNEK servisu hamutuk MNEK Portugál hodi buka oportunidade halo formasaun ba ita-nia maluk timoroan sira, ajénsia ruma ne’ebé iha, konsege balun kompañia bolu ona sira ba tuir formasaun báziku ho lingua nian no abilidade balun, nune’e sira hetan oportunidade provizória servisu iha Portugál,” nia dehan.
Deputadu CNRT, Maria Fernanda Lay, nafatin husu MNEK iha ona akordu entre Timor-Leste ho Komunidade Nasaun Ko’alia Lian Portugés (CPLP, siglá portugés) sira seluk to’o ne’ebe ona, espesífika ho Portugál.
“Liga ba traballadór, agora todan boot ba Estadu Portugál, tanba finanseiru sira fó boot, to’o bainhira mak resolve. Se sira lakohi fila tanba sira-nia prezensa iha ne’eba ilegál, ne’ebé tuir loloos memorandum of undarstanding ne’e hodi prepara didi’ak, SEFOPE tenke fó formasaun la’ós ba iha ne’eba mak ema fó fali formasaun,” nia hateten.
Deputada PD, António da Conceição ‘Kalohan’, mós husu prosesu negosiasaun atu ofisializa akordu Timor-Leste ho Portugál.
Nia mós hato’o, ligadu akordu mobilidade ema iha nasaun CPLP, MNEK iha ona esforsu ruma halo ka lae hodi fó garantia ba timoroan iha direitu atu ba iha Portugál ka lae.
Deputadu KHUNTO, António Verdiál de Sousa no Deputada Fretilin, Josefa Perreira, ezije atu kontrola ajénsia sira-ne’ebé haruka ema timoroan ba servisu iha rai-li’ur.
Notísia Relevante: Governu aprova proposta rezolusaun ratifika akordu mobilidade Estadu membru CPLP
Jornalista : Nelson de Sousa
Editór : Cancio Ximenes
