DILI, 17 janeiru 2023 (TATOLI) – Governu Timor-Leste, liuhosi Ministériu Finansa (MF), sei selebra akordu empréstimu ho Banku Aziátiku ba Dezenvolvimentu (BAD) ho montante millaun $70 atu finansia Programa Cadeia de Valor.
“Orsamentu ne’e sei fó apoiu liu ba serbisu agrikultura nian, nune’e bele aumenta produsaun rai-laran”, Vise-Ministru Finansa, António Freitas, hateten hafoin relata progresu serbisu ministériu nian ba Primeiru-Ministru, Taur Matan Ruak, iha Palásiu Governu.
Governante ne’e dehan Xefe Governu husu ba Ministériu Finansa atubele haree asuntu ne’e ho BAD. “Diskute ho kuidadu, hanesan lokalidade ba projetu, liuliu oinsá projetu ne’e benefisia ba agrikultór sira”, nia afirma.
Vise-ministru konsidera katak orsamentu ne’e sei ajuda tebes agrikultór sira bainhira laiha udan no susar tebes atu hetan bee-moos. “Entaun, ho orsamentu empréstimu ne’e sei harii barrajen iha foho leten, nune’e bee ne’ebé mak mai akumula hotu tiha. Bainhira bee laiha, bele kanaliza ba agrikultór sira hodi halo atividade. Osan ne’e benefisia liu ba povu”, nia salienta.
Realizasaun asinatura akordu ne’e sei hein desizaun hosi Konsellu Ministru hodi atribui podér.
Governu empresta ona osan hosi BAD desde tinan 2012 hamutuk millaun $700. Osan sira ne’e finansia ba projetu estrada munisípiu Liquiça ba postu administrativu Maubara, estrada Tasi-Tolu bá Tibar-Gleno, estrada Manatuto-Baucau no trosu Baucau-Viqueque.
Jornalista: Antónia Gusmão
Editora: Maria Auxiliadora
