DILI, 01 fevereiru 2023 (TATOLI)— Diretór Jerál Turizmu iha Ministériu Turizmu Komérsiu no Indústria (MTKI) Jelino Soares, hateten, ministeriu halo ona koordenasaun ho parte hotu atu simu turista estranjeiru 232 ne’ebe sei to iha Dili, Timor-Leste ho ró Kruzeiru MS Paul Gauguin hosi Austrália, kinta (02/02/2023).
Nia dehan, relasiona ho turista sira ne’ebé aban atu mai, MTKI nia parte halo ona liña koordenasaun ho ajénsia operadór turistika sira, ho Polísia Nasiona Timor-Leste (PNTL), APORTIL, imigrasaun, Autoridade Aduaneiru (Alfándega), no karantina oinsá aban atu simu tursita sira ne’e.
“Relasiona ho turista estranjeiru 232 ne’ebé aban sei mai ita koordena ona ajénsia Lai-Ara Shipping hodi prepara bus sia hein turista sira iha Portu Dili, bainhira sira to’o mai, sei lori sira ba haree fatin istóriku sira ne’ebé turista sira hakarak haree,” Jelino Soares dehan ba Agência Tatoli, iha nia-knaar fatin Farol, Dili, kuarta ne’e.
Notisia relevante : 02 fevereiru, turista 232 ho ró Kruzeiru MS Paul Gaugauin sei atraka iha Dili
Nia dehan, vizita hosi turista sira ne’e, MTKI nia parte la halo preparasaun hanesan tinan kotuk loke feira iha Portu Dili, tanba turista sira-nia viajen mai ne’e urjente maibé sira-nia parte sei halo esforsu koordena ho artezenatu sira bele ba faan sira-nia produtu iha portu Dili no iha Tais Market Colmera.
“Ita la halo feira maibé koordena ho ita-nia grupu artezenatu sira bele ba faan sira-nia produtu no ita mós iha tais market ne’ebé turista sira bele ba vizita sosa produtu sira ne’ebé sira hakarak,” nia dehan.
Nia dehan, turista 232 ne’ebá aban sei to’o mai Dili, ajénsia sira sei lori tuir mapamentu ne’ebé iha. Hanesan, iha Dili laran sira sei vizita fatin istóriku hanesan Arikivu Muzeu Rezisténsia Timorense (AMRT), Sentru Nasional Chega (CNC, sigla portugés), Tais Market Colmera, Cristo Rei, Railaco Timor Global hodi haree prosesu kafé, no ba Liquiça Maubara Fort.
“Kona-ba sanitária ka hariis fatin públiku durante ita-nia turista sira iha Dili, ita mós halo ona preprasaun, koordena ona ho Bee Timor-Leste, Empreza Públiku (BTL,E.P) karik bee laiha bele tau bee, ba haris-fatin públiku sira ne’ebé iha nune’e turista sira bele uza,” nia dehan.
Jornalista : Arminda Fonseca
Editora : Armandina Moniz
