DILI, 30 janeiru 2023 (TATOLI) – Xefe Operasionál hosi Ajénsia Lai-Ara Shipping, Jorgino Ribeiro, hateten, iha loron 02 fevereiru 2023 turista hamutuk 232 sei mai ho ró Kruzeiru MS Paul Gaugaun hosi Austrália sei atraka iha portu Dili.
Nia dehan, ró Kruzeiru MS Paul Gauguin hosi Austrália ne’ebé tula pasaseiru 232 sei to’o Portu Dili oras 07h00 dadersaan no sira iha Dili durante oras balu de’it kontinua fali halo viajen.
Nia dehan, durante turista sira iha Dili, rute ne’ebé Ajénsia prepara turista sira atu vizita mak hanesan sítiu turístika Arkivu Muzeu Rejisténsia Timorense, Cristo Rei, Ermera no Maubara-Liquiçá.
“Ita-nia ró Kruzeiru MS Paul Gaugauin ne’ebé mai ne’e sei tula turista hamutuk 232 no tékniku sira iha ró laran hamutuk 225,” Jorgino Ribeiro dehan ba Agência Tatoli, via telefónika, segunda ne’e.
Nia dehan, turista sira ne’e, hafoin vizita kontinua kedas vizita sítiu istóriku ba Illa Komodo Indonézia.
Kona-ba preprasaun atu simu turizmu ne’e daudaun ne’e sira-nia parte koordena ho Ministériu Turizmu Komérsiu no Indústria (MTKI) liuhosi Sentru Informasaun no Turizmu (CIT,sigla portugés).
Nia afirma, hosi turista 232 ne’e maihosi nasaun oioin hanesan, Austrália, Europa, no Estadu Unidu Amérika.
Jornalista: Arminda Fonseca
Editora : Armandina Moniz
