DILI, 09 fevereiru 2023 (TATOLI)—Ministériu Turizmu Komérsiu no Indústria (MTKI), kinta ne’e, halo enkontru preprasaun ba fenómenu eklipse solar híbridu ho liña ministeriál, setór privadu, operadór otél sira no operadór telekomunikasaun hodi fó opiniaun ba malu antes lori proposta ba Konsellu Ministru (KM).
“Objetivu hosi enkontru ne’e, oinsá parte hotuhotu fó opinaun ba malu kona-ba preprasaun simu vizitante ba fenómenu eklipse solar híbridu ne’ebé sei akontese iha loron 20 abril 2023. Ho ida ne’e, ita tenke tau ideia hamutuk antes lori proposta sira ne’e hotu ba Konsellu Ministru para hetan aprovasaun. Tanba eventu ida ne’e sei fó vantajen boot ba Timor-Leste,” Asesór Espesialista Turizmu, Manuel Vong hateten ba jornalista iha Farol, Dili.
Nia dehan, Governu tenke halo preprasaun másimu tanba hotuhotu hatene, ema sientísta sira ne’ebé durante akompaña ba eklipse solar ne’e hamutuk 50.000. Tanba ne’e, haree ba kondisaun agora Governu hamutuk ho setór privadu no seluk tan tenke prepara hodi simu turista sira mai Timor-Leste.
Notisia relevante : 20 abril akontese Eklipse Solar híbridu sei aprezenta fenómenu tipu tolu
“Pontu importante ne’ebé ita ko’alia ohin mak tenke prepara kria ekipa ida involve entre liña ministeriál hodi toma konta ba eventu fenómenu ne’e, hodi halo levantamentu ba iha fatin sira ne’ebé sei akontese fenómenu. Atu bele hatene oinsá komunidade bele hatene bainhira mosu fenómenu no, atu kria fasilidade ba kondisaun ita-nia vizitante sira ne’ebe sei ba haree iha fatin akontesimentu fenómenu,” nia dehan.
Pontu seluk, nia dehan tenke haree mós ba iha konektividade tanba turista sira ba mai hosi rai-liur tenke iha serteja ida ho voo sira ne’ebé iha. Nune’e mos haree ba transporte lokál nomos kona-ba akomodasaun.
“Kondisaun akomodasaun ne’ebé ita kria depende ba númeru loloos hosi turista sira ne’ebé atu mai. Tanba, kona-ba númeru ne’e, ajénsia operadór turístika sira mak hatene,” nia hateten.
Kona-ba akomodasaun fatin ba iha parte Com-Lautem no Beaço, otél la sufisiente. Maibé sei esforsu mak dala-ruma komunidade nia uma sai alternativa ba turista sira hodi bele toba. Se lae bele harii camping ka tenda hodi bele akumula hotu bainaka sira ne’e.
Notisia relevante : PR husu Governu halo kampaña Solar Eklipse no fahe óklu espesiál
Maibe, kona-ba desizaun sira ne’e, ekipa tékniku sei prepara didi’ak hodi aprezenta ba Governu liuhosi KM mak sei foti desizaun tomak, liuliu atu sosa oklu no orsamentu hira mak sei gasta ba atividade ne’e,” Manuel Vong hateten.
Reuniaun preparativu ba fenómenu eklipse solar ne’e rasik, ohin hetan partisipasaun hosi Ministériu Transporte no Komunikasaun (MTK), liuhosi Diresaun Nasional Meteorolójia no Jeofízika (DNGM, sigla portugés), Setór Privadu sira hanesan, Kámara Komérsiu Timor-Leste (CCI-TL, sigla portugés), Polísia Nasional Timor-Leste (PNTL), operadór turístika, operadór telekomunikasaun sira no seluk tan.
Notisia relevante : DNMG : Fenómenu eklipse solar híbridu sei akontese minutu ida ho balun
Jornalista : Arminda Fonseca
Editora : Armandina Moniz
