DILI, 13 feveiru 2023 (TATOLI)—Vise Ministra Solidariedade Sosiál no Inkluzaun (MSSI), Signi Verdial, hateten labarik ne’ebé mak halo atividade negósoiu iha dalan ninin ne’e lei protesaun ba labarik bandu no la fó dalan.
“Ba kestaun ne’e, tékniku sira sei halo verifikasaun ba dadus para depois Governu bele tau matan. Maibé iha inan-aman balun, husik sira-nia oan hala’o atividade negósiu iha estrada ninin, ida-ne’e lei protesaun ba labarik bandu,” nia hateten liuhosi nota imprensa ne’ebé Agência Tatoli asesu, segunda ne’e.
Tan ne’e, nia dehan, MSSI sei hala’o servisu hodi rekolla dadus hodi haree situasaun família nian loloos ne’e vulneravél duni ka inan-aman sira mak halo abuzu ba oan sira.
“Tanba ko’alia kona-ba labarik sira fa’an sasán iha estrada ninin, iha lei protesaun ba labarik, iha artigu ida bandu atividade hanesan ne’e. Tan ne’e, hosi parte MSSI sei hala’o servisu liu-liu atu komunika ho inan-aman sira, atu haree asuntu ida-ne’e. Tanba inan-aman balun kbiit la to’o, entaun labarik sira hili dalan apoiu sira-nia inan-aman liuhoasi fan sasan iha estrada ninin,” nia dehan.
Iha loron 07 fevereiru 2023, Parlamentu Nasionál liuhosi plenária aprova ona projetu-lei númeru 29/V(3a)-lei protesaun labarik no joven iha perigu ho votu a-favór 36, kontra no abstensaun 0.
Notísia Relevante: PN aprova projetu-lei protesaun ba labarik iha finál globál
Jornalista : Osoria Marques
Editór : Cancio Ximenes
