VIQUEQUE, 14 fevereiru 2023 (TATOLI)— Empreza responsavél, tersa ne’e, konklui ona konstrusaun no loke ona ba públiku atubele utuliza hala’o movimentu iha ponte Buanurak iha postu administrativu Ossu, Munisípiu Viqueque.
“Ohin, empreza responsável Internasionál ba konstrusaun ponte foun Buanurak nian, hahú loke ba públiku atu komunidade sira bele hala’o movimentu iha munisípiu Viqueque liu hosi ponte foun ne’e,” hateten Diretór Serbisu Obra Públiku, Munisípiu Viqueque, Mario do Rego, ba Agência Tatoli, iha postu Viqueque-Villa, tersa ne’e.
Notísia relevante: Semana oin, empreza finaliza konstrusaun ponte Buanurak iha Viqueque
Maske, empreza responsável loke ona ponte foun ba públiku, maibé sei limite ba transporte sira ne’ebé ho kapasidade boot labele utuliza lai tanba ponte ne’e sei foun.
“Karreta sira ne’ebé tula kontainer no tula eskavadór sira labele liuhusi ponte leten tanba ponte ne’e seidauk bele satan ka lori todan liu ne’ebé todan, se karik karreta sira ne’ebé boot tenke liu hosi mota. Maibé transporte hanesan bís, truck no veíkulu ki’ik sir abele utuliza ona,” nia afirma.
Nia agradese ba empreza resposavél ne’e tanba bele konklui ona konstrusaun no loke on aba públiku hodi fasilita movimentu transporte públiku.
“Ha’u haree ponte tuan kotu difikulta tebes ba ita-nia transporte sira ne’ebé movimentu ba Dili no husi Dili mai Viqueque tenke liu hosi mota mak bele liu. Nune’e agradese ba empreza tanba ponte hotu ona no abitante sira bele hala’o movimentu ho di’ak”, nia agradese.
Ponte foun iha área Buanurak ne’e lokaliza iha baliza entre postu administrativu Ossu no postu administrativu Viqueque-vila, munisípiu Viqueque.
Kompañia ne’ebé konstrui ponte ne’e mak China Railway International Group Co Ltd, hamutuk ho China Overseas Engineering Group Co, Ltd, ne’ebé kustu ba infraestrutura ne’e tama ba pakote projetu konstrusaun estrada nasionál hosi munisípiu Baucau ba Viqueque, iha lot rua hosi Baucau to’o Venilale no hosi Venilale to’o Viqueque ho kustu $23.853.175,70.
Notísia relevante:Empreza responsável hahú fui ona semente ba ponte Buanurak Viqueque
Jornalista : Vitorino Lopes da Costa
Editór : Florencio Miranda Ximenes
