INGLATERA, 14 fevereiru 2022 (TATOLI) – Timoroan sira ne’ebé halibur aan iha organizasaun ETAP (East Timorese Association Peterborough) hetan konvite husi Liurai Inglatera Charles III hodi partisipa iha “British Asia and South-East Asian Communities in UK”, iha Palásiu Buckingham, London, semana kotuk.
Iha momentu oportunu ne’e, autoridade másima ETAP, Celso Oliveira, simu nomeasaun hosi Governu Britániku: South East Asia Department (SEAD), Foreign, Commonwealth and Development Office (FCDO) Indonesia and Timor-Leste Desk Officer hodi reprezenta Timor-Leste nu’udar úniku Timoroan iha serimónia ofisial ne’e, ne’ebé partisipa ema besik atus tolu hosi Sudezte Aziátiku tomak iha Reinu Unidu.
“Hanesan Timoroan senti onradu no privilejiu bo’ot ida. Primeiru, tanba ETAP ninia servisu durante ne’e lori benefísiu di’ak barak ba Timoroan iha UK. Segundu, Governu britániku valoriza ETAP hodi nomea ha’u nu’udar Timoroan partisipa iha eventu ofisiál importante iha Buckingham Palace London,” Prezidente ETAP, Celso Oliveira apresia, liuhusi komunikadu ne’ebé diriji ba Tatoli, ohin.
“Timor-Leste moris iha pás, demokrasia”
Durante serimónia, Líder másimu ETAP kumprimenta Liurai Charles no Prinseza Anna inklui aproveita ko’alia ho Família Real kona-ba Timoroan iha Reinu Unidu no fó obrigadu ba oportunidade ne’ebé timoroan sira hetan durante tinan barak nia laran iha nasaun ne’ebé lokaliza iha kontinente Europeu ne’e.
“Ha’u hato’o obrigadu ba oportunidade ne’ebé Reinu Unidu fó ba Timoroan rihun lima nulu resin hafoin ukun rasik aan oras ne’e moris, serbisu no eskola iha UK. Mensajen ne’ebé Liurai Charles no Princessa Anna transmiti maka hakarak atu Timor-Leste moris iha pás, demokrasia no dezenvolvimentu nia laran. Iha oportunidadi ne’e, ha’u mos aproveita loke networking (rede) ho grupu sira seluk hosi Southeast Asia iha Reinu Unidu”, Celso Oliveira haktuir.
Entretantu, ETAP nu’udar asosiasaun Timoroan ne’ebé dezde 2010 fó apoiu ba Timoroan iha Peterborough no fatin seluk. Dezde ukun aan to’o oras ne’e, Timoroan besik rihun lima nulu moris, serbisu no eskola iha Reinu Unidu.
Iha sidade Peterborough, oras ne’e Timoroan rihun ida resin mak serbisu no eskola. Inan-aman serbisu iha fábrika maibé oan sira eskola hosi ensinu primáriu to’o universidade.
Tatoli
