DILI, 15 fevereiru 2023 (TATOLI)—Prezidénsia Repúblika koordena serbisu hamutuk ho Organizasaun Internasionál Asia Region no Programa Umanitária (BRAC, siglá inglés) hodi apoia serbisu Prezidensia Repúblika iha área nutrisaun, saúde, edukasaun no agrikultura.
Asesór Polítiku Prezidente Repúblika, Tomas do Rosario Cabral, hateten ohin enkontru ho Diretór (BRAC), Sajedul Hasan no ekipa hodi konvida mós Diretór Eskola Téknika Vokasionál Koléjiu Fatumaca-Gariuai-Baucau, Pe. Elígio Locatelli, SDB, ne’e importante no fahe esperiénsia ba BRAC.
“BRAC rona polítika Prezidénsia nian hodi koopera no buka apoia hodi fó susesu ba serbisu Prezidénsia nian iha área kombate nutrisaun, saúde, edukasaun no agrikultura durante mandatu Prezidente nian,” nia hateten.
BRAC konsidera Eskola Téknika Vokasionál Koléjiu Fatumaca-Gariuai-Baucau nu’udar referénsia ba eskola hotu iha Timor-Leste, tanba produtivu prodús rekursu kualifikadu no durante tinan barak eskola ne’e hala’o serbisu agrikultura nian hodi prodús varidade produtu lokál hodi apoia aihan ba komunidade ne’ebé presiza liu.
Diretór Eskola Téknika Vokasionál Koléjiu Fatumaca-Gariuai-Baucau, Pe. Elígio Locatelli, SDB, agradese bele serbisu hamutuk ho Prezidénsia Repúblika no BRAC bele hala’o vizita to’o sira nia fatin Fatumaca hodi haree direta progresu serbisu iha ne’ebá.
“Ne’e enkontru di’ak ida atu ita bele serbisu hamutuk hodi haree ita-nia problema nutrisaun, maibé ha’u hakarak sira bele vizita ba to’o Fatumaca haree direta serbisu iha ne’ebá,” nia dehan.
Iha oportunidade ne’e, Padre Locatelli entrega mós relatóriu serbisu ba PR kona-ba apoiu PR nian hodi fornese kombustível litru 5000 hodi ense ba tratór fila rai halo natar no toos iha loron 04 novembru 2022.
Ho apoiu PR nian ne’e, populasaun agrikultór sira konsege prodús aihán lubun ida hanesan foos, batar, aifarina no produtu seluk tan.
Iha parte seluk, Pe. Locateli mós preokupa daudaun ne’e produsaun aihán menus iha territóriu Timor-Leste, tanba natar toos agrikultór nia barak mak mota sobu durante inundasaun iha tinan kotuk to’o agora laiha solusaun.
Nune’e, nia husu ba Governu atu halo intervensaun urjénsia hodi bele rezolve problema menus aihan hodi labele fó impaktu ba povu sofre krize aihan no hamalaha.
Entretantu, Direitór BRAC, Sajedul Hasan seidauk bele fó komentariu, tanba sei hala’o enkontru ho Xefe Estadu hodi bele rona orientasaun PR atu bele informa mós sira-nia programa atu apoiu Prezidénsia Repúblika, Governu no sosiedade Timor-Leste.
Jornalista : Nelson de Sousa
Editór : Cancio Ximenes
