DILI, 22 fevereiru 2023 (TATOLI) – Klube primeira divizaun Atletico Ultramar/Coração Fc kontinua lidera tabela klasifikasaun ho pontu haat bainhira empata 1-1 ho AD SLB Laulara iha jogu kontinuasaun Liga Futeból Timor-Leste (LFTL) ne’ebé realiza iha Estádiu Munisipál Dili, kuarta lorokraik ne’e.
Minutu primeiru ekipa rua lansa kedan kontra no atake ba malu liu hosi tátiku no fintas bola ba mai iha kamu laran tuir kapasidade no abilidade ekipa idaidak nian.
Jogu manas liutan bainhira jogadór hosi ekipa rua halo presaun maka’as ba malu tuir orientasaun treinadór ekipa nian, se mak lais nia mak sei hatama uluk golu.
Meiu hotu ekipa rua ne’e halo maibé jogu la diferente ba ekipa rua ho nune’e ekipa rua seidauk bele halo golu ruma iha minutu primeiru ne’e, avansadu SLB kompostu hosi Mouzinho de Lima (10) Jenivio Mota (7) no seluktan halo presaun maka’as ba rede Ultramar nian maibé sutu hirak ne’e seidauk kona iha alvu no balu guarda-rede Ultramar Francisco Gusmão (1) salva ka baku sai.
Ultramar mós la nonok de’it iha kampo laran maibé halo jogu ho defensive maibé akompaña mós ho bola log ka bola aas, maibé sutu barak avansadu Ultramar nian halo seidauk kona iha alvu no balu guarda rede tenta salva.
Jogu la nonok tanba iha tribun sorinsorin Estádiu nian infeta ho adeptus ekipa rua ne’ebé haklalak hodi fó apoiu masimu ba sira-nia ekipa favoritu nune’e bele fó esperansa ba jogadór sira iha kampo laran labele baruk atu halo nafatin jogu ho brillante.
Esforsu hirak ne’ebé SLB lansa la hela de’it ho naran maibé konsege fó duni rezultadu ne’ebé di’ak iha minutu 35 bola komesa barullu maka’as iha liña oin Ultramar nian jogadór Kornelis Portela (11) sutu bola aas ida ho kalma ba lina oin simu kedan hosi jogadór Bakayoka Ozi (2) lansa kedan sutu ba rede Ultramar la konsege salva hosi guarda rede Francisco bola tama liu ba rede laran muda kedan rezultadu ba 1-0.
Hosi golu ne’e lori SLB lidera provizóriu jogu ne’e, maibé jogadór Ultramar hotu nafatin esforsu no la lakon esperansa, mantein iha sira-nia pozisaun hodi hametin liutan sira-nia unidade iha kampo laran.
Maibé SLB nafatin defende títulu ne’e to’o meinutu primeira parte termina rezultadu mantein 1-0.
Hakur ba segunda parte, ekipa Ultramar nafatin esforsu no aumenta solidu liutan iha sira-nia ekipa, ho nune’e esforsu hirak ne’e la hela de’it hanesan esforsu tanba iha menutu 62 jogadór defeza SLB nian Cristovão Fernandes (23) halo falta hasoru jogadór Ultramar Jeca Monteiro (6) iha lina oin SLB nian árbitru foti desizaun hodi fó penalidade ba Ultramar lansa sutu livre.
Penalidade ne’e ezekuta hosi jogadór Carlos Ximenes (16) konsege fura rede SLB nian muda kedan rezultadu ba 1-1.
Hosi golu ikus Ultramar prodúz ne’e hasa’e liutan ritmu jogu nian maibé ekipa rua solidu tebes fó fatin ba malu atu hatama tan golu iha minutu 63 ba leten.
Esforsu hotu hela de’it hanesan esforsu tanba ekipa rua lansa kontra no atake hirak ne’e la fó rezultadu di’ak to’o minutu 90 termina árbitru hú apitu hapara jogu no ekipa rua obrigadu tenke fahe pontu ba malu.
Hosi rezultadu ne’e lori Ultramar sae ba tur metin iha tabela klasifikasaun provizóriu ho pontu haat enkuantu SLB hetan de’it pontu ida tur iha lina klaran tabela klasifikasaun nian.
Eskuad Ultramar:
Francisco Gusmão (1), Carlos Ximenes (16), Denilson dos Santos (17), Yohanes Gusmão (12), Romulo Escurial (13), Albertino Ribeiro (21), Bendito Ximenes (7), Miguel Barbosa (19), Pascoal Fernandes (9), Miguel Fernandes (8) Jeca Monteiro (6).
Suplente:
Alexandre Lião (90), Juninho Ximenes (3), Isaac Gama (15), Adão Gusmão (5), Nelson Castro (23), João Xavier (11), Alexandre Boavida (4), Denilson de Almeida, Jorge Gusmão (22) no Elzo Tavares.
Treinadór: Siquito do Carmo
Eskuad SLB:
Filonito Nougueira (12), Bakayoko Ozi (2), Jhon Friht Oliveira (6), Filomeno da Costa (18), Cristovão Fernandes (23), Filipe Oliveira (24), Gumario Moreira (5), Jeremias Baptista (69), Kornelis Portela (11), Zenivio Mota (7), Mouzinho de Lima (10).
Suplente:
Andrew Mensa (13), Michel Hutabarat (26), Tomas Sarmento (4), Alexandro Ima Kefy (21), Natalino da Costa (8), Fernando Carvalho (3), Aldo Amaral (19), Domingos Ribeiro (22), Alexandro Lemos (9), Norbert Gonçalves (14) no Vabio Pires.
Treinadór Julião Monteiro
Jogu ne’e lidera hosi árbitru Romario Tety, juiz da liña Antonio Carvalho, Paulo da Costa no árbitru rezerva Pedro Braga.
Tabela klasifikasaun provizóriu primeira divizaun
Atletico Ultramar/Coração pontu haat, Aitana FC pontu tolu, Assalam FC pontu tolu, Academica FC pontu ida, AS Ponta Leste pontu ida, AD SLB pontu ida, Karketu, Porto Taibessi no Emmanuel mantein ho pontu zero.
Jornalista:Hortencio Sanchez
Editór: Rafael Ximenes de A. Belo
