DILI, 24 fevereiru 2023 (TATOLI) – Ajénsia Kooperasaun Internasionál Japaun (JICA, sigla inglés) no Departamentu Kooperasaun Internasionál (ICD, sigla inglés), hakarak hametin liután kooperasaun ho Ministériu Justisa (MJ), iha servisu setór justisa.
“ICD vizita fila fali Timor-Leste ba dala-rua hafoin pandemia Covid-19, iha vizita ne’e akompaña mós hosi Naito Shintaro, hanesan Diretór ICD, ho objetivu koalia servisu kooperasaun iha futuru”, katak iha komunikadu ne’ebé Agência TATOLI asesu hosi media JICA, ohin.
MJ Tiago Amaral Sarmento, agradese ba JICA no ICD tanba tempu naruk apoia Timor-Leste, ne’ebé mós kontibui ba promulgasaun lei sira hanesan rejistrasaun perdiál no kadastrál ninian, nafatin husu atu servisu hamutuk atu bele la’o nafatin iha futuru, atu hafasil komunidade nia asesu ba Justisa.
“Agradese ba Governu Japaun liuhosi nia Agência iha ne’e hanesan JICA no IDC ne’ebé halo kooperasaun ho di’ak tebes ho ajuda ita nia servisu justisa iha Timor-Leste”, ministru dehan.
Aleinde ne’e, ICD mós organiza semináriu ida kona-ba Komparasaun Sistema Rejistrasaun Propriedade nian entre Timor-Leste no Japaun iha STJ, ne’ebé fasilita hosi profesór sira hosi Departementu Koperasaun Internasional, Ministeiru Justisa, Japaun ninian.
Rekorda fali katak JICA no IDC halo kooperasaun servisu ho MJ hahú kedan iha tinan 2009 ba no agora hanesan faze ida reforsa liután kooperasaun entre JICA, IDC no MJ.
Jornalista:Hortencio Sacehez
Editór : Zezito Silva
