DILI, 24 fevereiru 2023 (TATOLI)— Sekretária Estadu Ambiente (SEA) husu públiku tenke kuidadu rikusoin biodiversidade hahú hosi animal tasi, rai-maran, liuliu flora no fauna iha Timor-Leste (TL).
“Nu’udar ema tékniku ida husu ba públiku tenke kuidadu ita-nia rekursu flora no fauna ka biodiversidade tanba rikusoin sira ne’e ita hotu nian,” Diretór Biodiversidade iha SEA, Rui dos Reis hateten ba Agência Tatoli, iha nia-knaar fatin, Bebora, Dili, sesta ne’e.
Nia hateten, bainhira ema hotu iha konsiénsia kuidadu rikusoin Timór nian liuliu biodiversidade ne’e, tanba nia impaktu pozitivu ne’e ba Timor-Leste. Tanba, liuhosi biodiversidade ne’e rasik mós bainhira kuidadu didi’ak sei reprezenta Timór ninian naran ba mundu.
“Ita haree hanesan animál fuik sira, ai-horis no seluk tan ida ne’e identidade kultura Timór nian ne’ebé tenke kuidadu nune’e, bainhira uza karik, uza tuir ita-nia nesesidade ekonómiku no labele estraga hotu. Ita presiza proteje nune’e futuru ita-nia jerasaun sira mós bele goja furak hosi ita-nia natureza,” nia hateten.
Nia dehan, hanesan ai-parapa sira iha Hera, Dolok-oan no fatin sira seluk daudaun ne’e, Governu halo esforsu haree animal fuik sira hanesan lekirauk no animal sira seluk hahú ba moris iha ai-parapa ne’e.
“Tanba ne’e, ita kuidadu ai-horis sira ne’e dada filafali ita-nia animál fuik mai,” nia dehan.
Journalista : Arminda Fonseca
Editora : Armandina Moniz
