DILI, 13 marsu 2023 (TATOLI)–Senadu Jerál Universidade Nacional Timor Lorosa’e (UNTL), Cristovão Araújo Mau-to, hatete mezmu atividade orientasaun ba estudante foun sira la konsege realiza iha loron 13 marsu segunda ne’e maibé estudante hamutuk 1.000-resin kontinua halo nafatin rejistrasaun.
Notísia Relevante: Reitór UNTL la konkorda senadu sira boikota orientasaun ba estudante foun
Nia hateten, dadu jerál ne’ebé mak nia simu ona hosi senadu sira hosi fakuldade sia (9) iha UNTL ne’e komesa ohin dadeer ne’e hatudu katak sei falta estudante foun hamutuk 1.000-resin mak seidauk ramata sira-nia prosesu administrasaun.
“Ita-nia estudante foun hamutuk 1.000-resin hahú ohin segunda feira ne’e, kontinua fali sira-nia inskrisaun. Ida-ne’e hatudu katak mezmu tarde maibé sira prontu atu kompleta prosesu administrasaun,” nia dehan ba jornalista sira iha kampus sentrál UNTL bainhira halo boikota ba atividade orientasaun ne’ebé Universidade deside ona ba estudante foun sira, segunda ne’e.
Nia dehan, desizaun senadu sira-nian klaru ona labele halo diskriminasaun ba estudante sira tanba sira mai iha tempu hanesan naran públika hosi komisaun Asesu Engeresu Ensinu Superiór (KAEES) mós hanesan tanbasá mak universidade labele hein sira ninia prosesu rejistrasaun finaliza tiha mak hahú halo orientasaun dala ida.
“Ami lakohi balun sei hahú hela prosesu inskrisaun, seluk fali hahú ona orientasaun ne’e labele. Buat sira ladi’ak hanesan ne’e mak ita buka atu hadi’a, atu nune’e imajen UNTL nian nafatin hetan kredibilidade di’ak iha públiku nia matan. Ita lakohi kada tinan sempre enfrenta hela de’it ho problema hanesan ne’e. Kuandu ida-ne’e mak ita-nia reitór ho ninia estrutura sira la toma atensaun, ami konsidera diskriminasaun boot ida hasoru estudante sira,” nia dehan.
Tuir nia, iha fakuldade ekonomia rasik ohin iha estudante na’in-haat mak seidauk halo rejistrasaun, sira mai ho farda eskola ensinu sekundáriu nian hodi aprezenta an ba komisaun organizadora, loloos universidade tenke haree asuntu ne’e ho sériu no responsabilidade tanba estudante sira-ne’e hein hela atu halo inskrisaun maibé prosesu atu atende sira mak seidauk hahú.
Entretantu, tuir obesrvasaun Tatoli iha terrenu katak estudnate na’in-haat ne’ebé seidauk halo prosesu rejistu ne’e mai hosi eskola ensinu sekundáriu Amigu de Jesus na’in rua, eskola ensinu sekundáriu jerál (ESG) 05 de maiu Bekora na’in-ida no eskola ensinu sekundáriu jerál (ESG) 04 setembru UNAMET Balide na’in-ida.
Jornalista : Tomé Amado
Editór : Cancio Ximenes
