DILI, 31 marsu 2023 (TATOLI) – Ministru Transporte no Komunikasaun (MTK), José Agustinho da Silva, hatete molok realiza konetividade via máritima entre Kupang (Indonézia)-Dili-Darwin (Austrália), tenke selebra uluk akordu ida.
“Ita tenke iha akordu sumbrinu ida sobre movimentu marítima ne’e. Governu liuhosi Ministériu Transporte oinsá maka bele fó solusaun ba akordu ne’e molok ba prosesu operasaun no asuntu hanesan mós ho Governu Austrália. Nune’e, loke espasu movimentu máritima ne’e la’ós domestika de’it maibé mós ba rai-li’ur”, Ministru Transporte hatete iha Palásiu Governu, sesta ne’e.
Ezekutivu ne’e esplika katak atu konetividade máritima abranje nasaun viziña sira, liuliu oinsá maka país iha ró-ahi bá to’o iha Kupang no bele mós to’o iha Darwin.
“Hanoin ida ne’e mosu bainhira vizita Estadu Prezidente Repúblika nian iha tinan kotuk bá Indonézia hasoru malu ho Prezidente Joko Widodo, momentu ne’ebá ha’u mós hola parte iha delegasaun ne’e”, nia relembra.
Xefe Estadu na’in-rua komprometidu atu iha futuru iha ligasaun máritima entre Timor-Leste no Indonézia no Timor-Leste no Austrália.
“Ideia hosi Xefe Estadu rua ne’e brillante tebes tanba bele haluan tan konetividade marítima Timor-Leste nian no kreximentu ekonómiku sa’e no hatama reseita ba kofre Estadu liuhosi Portu sira”, nia realsa.
Iha jullu 2022, Prezidente Republika Indonezia husu Timor-Leste atu hasa’e ligasaun marítima no terrestre liuhosi rota entre Kupang-Dili-Darwin.
Tuir notísia ANTARA nian ne’ebé Tatoli sita katak Prezidente Jokowi aprezenta asuntu ne’e iha ámbitu vizita Xefe Estadu Timor-Leste, José Ramos Horta, ho nia delegasaun, iha Palásiu Prezidensiál Bogor-Indonézia.
Refere ba ideia Xefe Estadu indonéziu nian ba hasa’e konetividade terrestre entre nasaun rua ne’e, Prezidente Ramos Horta lansa ona, iha 30 marsu, operasaun autokarru Babadok Express ho rota Dili-Kupang. Hosi parte Indonézia nian iha ona sirkulasaun DAMRI ho rota Kupang-Dili.
Notísia relevante : https://tatoli.tl/2023/03/30/horta-espera-tl-ri-realiza-konetividade-maritima-entre-kupang-dili-darwin/
Jornalista: Antónia Gusmão
Editora: Maria Auxiliadora
