DILI, 11 abríl 2023 (TATOLI)- Diretór Investigasaun Komisaun Anti-Korrupsaun (CAC, sigla portugés), José Verdiál, hateten, CAC sei la halo kontrolu ba karreta Estadu sira durante kampaña eleitorál.
“Ita-bo’ot sira (jornalista) hatene poder investigasaun no poder ba aktu prevensaun kriminál no investigasaun kriminál ne’e kabe ba iha Komisáriu, i Komisáriu mak iha kompeténsia atu bele kontrola investigadór ka halo atuasaun ba polisiál kriminál sira nian servisu, no atu asegura legalidade. Sé Komisáriu laiha, entaun teknikamente ami labele halo atuasaun sira ne’e, tanba bele fó fila fali risku ba investigadór sira, ba komete krime abuzu poder, “José Verdiál, hateten ba jornalista sira iha kna’ar-fatin CAC, Farol, Dili, tersa ne’e.
Notísia relevante:Laiha komisáriu, afeta ba funsionamentu CAC
Tanba, poder ne’e fó ba Komisáriu, kuandu liga ba aktu atuasaun no prevensaun krime korupsaun sira Komisáriu mak sei distribui ninian poder investigasaun ne’e ba iha investigadór sira.
“Maibé hanesan ita haree iha loron 5 fulan abríl liubá, Parlamentu Nasionál termina mandatu Komisáriu Komisaun Anti-Korrupsaun nian no anula despaixu ne’ebé antes ne’e prolongasaun mandatu Komisáriu nian,tanba ne’e CAC entermu tékniku Komisaun Anti-Korrupsaun labele halo buat ida,” José Verdial salienta.
Notísia relevante:Parlamentu Nasionál hakotu mandatu Komisáriu CAC
Maske nune’e, ezekutivu ne’e hateten, hanesan sidadaun kuandu haree funsionáriu ba ajente Estadu lori karreta Estadu no motórizada Estadu ba tuir kampaña hetan aktus ida ne’e nia parte sei halo denunsia.
“Kuandu ita haree krime korrupsaun ka hetan kualker informasaun rona no ita iha ema balun mak utiliza sasan Estadu ba nia privadu ka lori ba kampaña ita nafatin halo denunsia ba iha Ministériu Públiku, tanba korupsaun ne’e ita konsidera hanesan krime públiku”, nia adianta.
Notísia relevante:CAC hahú halibur informasaun funsionáriu uza karreta Estadu tula atributu partidu
Entretantu, iha lei kriasaun CAC iha númeru 8/2009 loron 15 jullu 2009 artigu 11 deskreve katak, mandatu Komisáriu CAC ne’e to’o de’it tinan haat, no kuandu halo renovasaun ba mandatu ne’e dala ida de’it.
Iha alinea 2 hateten, mandatu Komisáriu CAC sesa automatikamente:
- Hahú hosi loron ne’ebé nia simu pose.
- Kuandu sofre inkapasidade fiziku, mentál permanente ne’ebé obriga nia labele dezempeña- nia servisu.
- Kuandu Komisáriu simu servisu ka halo atividade seluk ka bolu inkompatibilidade iha funsaun.
- Bainhira nia mate.
- Bainhira-nia rasik renunsia.
- Kazu sira ne’ebé iha ona sem tenza ba nia ne’ebé mak iha pena prizaun efetiva
- Ka iha ezonerasaun ne’ebé aprova hosi Deputadu Palmentu Nasionál no proposta ezonerasaun ne’e mai hosi Primeiru-ministru tanba Komisáriu komete violasaun ne’ebé la tuir lei haruka.
Jornalista : Natalino Costa
Editór : Rafael Ximenes de A. Belo
