MALIANA, 17 abríl 2023 (TATOLI)— Primeiru Ministru (PM), Taur Matan Ruak, segunda ne’e inaugura infraestrutura edukativa hamutuk 59 ne’ebé konstrui no reabilita hosi Ministériu Edukasaun, Juventude no Desportu (MEJD) liuhosi projetu komunitária tinan 2021-2022.
Serimónia inaugurasaun ne’e, simbolikamente realiza iha eskola Sekundária Jerál Númeru I, Dom Martinho da Costa Lopes Maliana, munisípiu Bobonaro no eskola sira-ne’ebé inaugura hosi munisípiu Aileu tolu, Ainaru tolu, Baucau lima, Bobonaro rua, Covalima sia, Dili ualu, Ermera hitu, Lautem hitu, Liquiçá tolu, Manatuto rua, Manufahi lima no Viqueque lima.
Infraestutura edukativa hirak-ne’e mai hosi nível pre-eskolár to’o sekudáriu jerál ho totál sala aula 191, casa de banho 36, sala profesór 21, eskritóriu neen, koziña ualu, laboratóriu IT rua no moru protesaun rua ho orsamentu ne’ebé ezekuta ba obra ne’e serka millaun $6,4 hosi orsamentu jerál estadu 2021.
Notísia relevante: PM Taur inaugura eskola TEKVOK Maria Regina Guterres Metinaro
Xefe governu louva MEJD ne’ebé hanesan ministériu implementadór, tanba liuhosi Projetu Konstrusaun no Reablitasaun Eskolár (PKRE) bele kontribui hadi’ak kualidade setór edukasaun iha rai-laran hodi prepara estudante sira-nia futuru atubele dezenvolve Timor-Leste sai nasaun ida-ne’ebé prósperu.
Eis Prezidente Repúblika ne’e hateten, VIII governu define prioridade ida ba ema, primeiru hakarak ema saúde di’ak, nia vida naruk tanba rikeza nasaun nian mak ema no ema mak sai sentru ba dezenvolvimentu.
“Hanesan ita-boot sira hetene nesesidade ita-nian ba dezenvolvimentu infraestrutura boot liu, ita halo ne’e sei mínimu, seidauk to’o, ita presiza halo esforsu liután hodi fó kobertura di’ak ida iha infraestutura eskolár iha Timor laran tomak,” Taur Matan Ruak hateten.
Xefe governu apela parte hotu atu kontribui no tau matan ba infraestrutura edukativa nasaun nian, nune’e tinan lima ka tinan 10 mai, setór edukasaun iha Timor-Leste bele atinje kobertura ba nesesidade agora hodi prepara kondisaun ba jerasau foun sira.
Primeiru Ministru husu Ministériu Edukasaun Juventude no Desportu atu preve tán orsamentu, nune’e dirijente eskola sira bele prezervasaun, manutensaun no konservasaun ba infraesturutra hirak-ne’e inklui jardín hodi hamatak ambiente eskola.
Ministru Edukasaun, Juventude no Desportu, Armindo Maia, reforsa hafoin halo inaugurasaun faze dahuluk ba eskola 94 nível nasionál ne’ebé realiza iha munisípiu Baucau fulan-janeiru 2023 ne’e, MEJD kontinua esforsu tomak hodi kompleta obra sira iha territóriu nasionál.
“Hosi inaugura primeira no segunda faze ne’e, ita kompleta ona konstrusaun hamutuk 153 eskola no totál sala aula hamutuk 503, alende ne’e ita sei kontinua tán obra restu hamutuk 70 eskola hodi kompleta hamutuk 228 eskola iha orsamentu jerál 2021-2022,” Armindo dehan.
Nia agradese no kongratula grupu komunitária sira no komapañia kontrutora sira tanba ho sira-nia serbisu maka’as mak bele finaliza konstrusaun obra hirak-ne’e.
Prezidente Autoridade Munisípiu Bobonaro, Ernesto de Oliveira Barreto, agradesde ba VIII governu ne’ebé durante esforsu maka’as implementa projetu hirak-ne’e atubele reponde ba nesesidade eskola nian.
“Edifísiu eskola sira-ne’e importante tebes realasiona ho prosesu ensinu apredizajen, dezenvolvimentu siénsia, dezenvolvimentu ba atividade hotu-hotu, atu forma joven ida-ne’ebé kualidade hodi kontibui ba dezenvolvimentu iha ita-nia nasaun,” nia katak.
Totál projetu komunitária tinan 2021-2022 ne’ebé governu implementa iha territóriu nasionál hamutuk 228, komposta hosi konstrusaun foun 218 hanesan sala aula 754, sala profesór 93 no hariis-fatin 81. Enkauntu reabilitasaun hamutuk eskola 10, sala aula 57, sala profesór lima no hariis-fatin tolu ho totál orsamentu millaun $29.
Notísia relevante: MEJD sei kontinua projetu komunitária 117 iha edukasaun pre-eskolár
Jornalista : Sérgio da Cruz
Editór : Evaristo Soares Martins
