VIQUEQUE, 17 abríl 2023 (TATOLI)–Abitante hosi suku Bahatata, postu administrativu Uatucarbau, munisípiu Viqueque, Tomas Pinto, husu Ministériu Agrkultura no Peska (MAP) aselera normaliza irrigasaun liga bá natar Daragata.
“Rai taka sedimentasaun halo irrigasaun iha ne’e sai problema, entaun bee labele asesu bá natar Daragata. Foin lalais parte MAP nasionál promete ba ami katak liu páskoa sira sei halo normalizasaun maibé agora liu ona maibé seidauk mai halo. Tanba ne’e sai preokupasaun boot ba ami. Ohin ha’u telefone ba MAP nasionál, sira dehan mina laiha no ema responsável ba asuntu ne’e laiha,” Tomas Pinto informa ba Agência Tatoli, via telefónika, segunda ne’e.
Nia relata, tuir loloos agrikultór sira iha loron 25 abríl hahú halo atividade iha natar ektare 75 maibé ho kondisaun irrigasaun maka sei labele realiza.
Notísia relevante : 2022, MAP konsege konstrui irrigasaun foun boot rua
“Iha ne’e tratór ida de’it, bainhira maka halai natar sira-ne’e. Ha’u hanoin iha tinan ida-ne’e ami labele halai natar tanba MAP seidauk hadi’a irrigasaun. Ami relata ona ba autoridade sira maibé dehan hein to’o tempu halo natar nian liu,” nia akresenta.
Nia esplika, bainhira halo irrigasaun hosi mota Naha Bo’o Sartebar la to’o loron rua bele hotu maibé presiza iha eskavatór hodi ajuda serbisu.
“Ami kee de’it ho liman sente labele ona, tanba ne’e ami husu ba MAP atu normaliza. Karik la mai normaliza signifika iha tinan ne’e ami la halo natar. Ami uza saida maka sustenta ba família uma laran, di’ak liu ami husu ba Governu hodi sustenta ami,” Tomas Pinto relata.
Natar Daragata Uatucarbau ektare 75 benefisia abitante Bahatata, Irabin de Sima inklui uma-kain 20 resin iha suku Irabin de Baixo.
Iha fatin ketak, Diretór Servisu Agrikultura munisípiu Viaqueque, Fernando Juaquin, dehan, problema irrigasaun la’ós iha parte Bahatata de’it maibé iha mós Uatulari, maski nune’e hato’o ona preokupasaun hirak ne’e ba parte relevante hodi rezolve.
“Ita iha ekipamentu eskavatór rua maibé seidauk bele responde preokupasaun hotu. Tanba ne’e ha’u sei tenta nafatin ba nasionál hodi normaliza nune’e abitante sira bele halai natar,” nia hato’o.
Jornalista : Vitorino Lopes da Costa
Editora : Julia Chatarina
