DILI, 20 abríl 2023 (TATOLI) – Komandante Polísia Nasionál Timor-Leste (PNTL), Superintendente Polísia Paulino Carmo, hateten suspeitu ne’ebé mak komete kazu omisídiu iha Ainaro kumpre ona prizaun preventiva.
“Depois suspeitu JCC kumpre tiha oras detensaun iha sela Komandu PNTL Munisípiu Ainaro durante oras 72, horseik ita-nia investigadór sira lori kedan suspeitu ne’e hodi ba submete iha Primeiru Interogatóriu Tribunál Judisiál Primeiru Instánsia Covalima (Suai). Husi rezultadu Primeiru Interogatóriu ne’e sira relata mai ha’u katak ita-nia suspeitu ne’e kumpre kedan Prizaun Preventiva”, Superintendente Polísia Paulino Carmo hateten ba TATOLi via telefône, kinta ohin.
Komandante Munisípiu Ainaro fundamenta katak suspeitu JCC, Ministeriu Públiku imputa ho krime omisídiu simples ne’ebé previstu iha a artigu 141 hosi Kodigu Penál Timor-Leste no krime arma branka.
Rekorda fali katak kazu omisídiu ne’e akontese iha Aldeia Coiloco, Suku Nunomoge, Postu Administrativu Hatu-Builico, Munisípiu Ainaro, iha segunda (17/4) iha tuku 4:00 madrugada.
Motivu hosi kazu omisídiu ne’e katak supeitu JCC tama iha uma lisan ida Berdato tenta naok sasan lulik iha uma lisan Berdato nian laran, maibé vítima sira mós ho hakfodak hader mai, esforsa aan oinsá, suspeitu labele foti sasán lulik sira ne’e. nune’e ikus mai suspeitu lori katana taa vítima sira.
Iha akontesimentu ne’e rezulta vítima na’in-haat, nain rua mate fatin, ida konsege evakua ba ospitál maibé la salva nia vida no ida seluk labarik ki’ik halo hela tratamentu iha Hospitál Nasionál Guidu Valadares (HNGV).
Jornalista: Natalino da Costa
Editór : Zezito Silva
