VIQUEQUE, 22 abríl 2023 (TATOLI)–Prezidente Partidu Libertasaun Populár (PLP) ho númeru sorteiu 03, Taur Matan Ruak, hateten, bainhira povu fó fiar tan hodi kaer ukun sei tau perioridade liu ba veteranu sira tanba iha tempu okupasaun veteranu sira fó kontribuisaun maka’as ba independénsia.
“PLP nia programa tinan lima mai oin, perioridade ida maka veteranu 03, 4 A7. Ita luta to’o sira hetan direitu tanba uluk ha’u-nia soldadu sira lori hahán ba FALINTIL sira dolar tun sa’e maka to’o fatin soldudu sira-nia abrigu. Tanba ne’e ha’u la haluha sira, nune’e ha’u husu ba imi fó fiar ba ha’u hodi ba ukun,” Taur Matan Ruak hateten iha kampaña iha kampu eis SMP 2 Beloi, sábadu ne’e.
Nia reforsa, bainhira kaer ukun tan sei defende interese povu no sei kria buat barak ba povu.
“Ha’u sei luta ba povu tomak, la’ós ba ha’u-nia an maibé defende povu nia direitu tomak no moris di’ak,” nia akresenta.
Notísia relevante : PLP kompromete hadi’a povu nia moris bainhira hetan konfiansa
Aleinde ne’e, nia kompromete tan atu kontinua fó bolsa estudu ba povu kbiit laek sira-nia oan hodi asesu ba edukasaun no kréditu ba estudante sira ne’ebé asesu ba universidade no bainhira eskola hotu, serbisu maka selu fali atu hakma’an inan aman sira-ne’ebé kbiit laiha hodi selu oan sira-nia eskola.
“Governu oferese prémiu ba estudante sira ne’ebé ho valór di’ak. Atu motiva estudante sira estuda, la’ós halimar facebook no whatsaap, tenke estuda no mate iha livru leten tanba ita hakarak investe iha edukasaun, ita-nia oan sira tenke matenek. Ha’u-nia mehi família ida-nia oan tenke tama ba universidade,” Taur hato’o.
PLP mós tau prioridade ba setór agrikutura hodi hasa’e produsaun rai-laran no hamenus importasaun.
“Ha’u hakarak povu hasa’e produsaun atu ita labele sosa ema seluk nia produtu. Tempu oin mai sei sosa tratór hodi distribui ba povu agrikultura sira uza halo serbisu halai natar, sama hare no dulas hare,” nia dehan.
Atividade kampaña ne’e hahú hosi tuku 13:00 to’o 18:00, ne’ebé hetan partisipasaun hosi militante no simpatizante PLP hosi postu Lacluta, Viqueque-Villa, Uatulari, Ossu no Uatucarbau.
Durante kampaña hetan seguransa hosi Polísia Nasionál Timor-Leste (PNTL) munisípiu Viqueque, no akompañamentu hosi Komisaun Nasionál Eleisaun (CNE, sigla portugés) inklui observadór nasionál no internasionál.
Jornalista : Vitorino Lopes da Costa
Editora : Julia Chatarina
