VIQUEQUE, 24 abríl 2023 (TATOLI)–Reprezentante abitante postu administrativu Uatulari, munisípiu Viqueque, Lemos da Silva, preokupa ho kondisaun ahi eletrisidade ne’ebé sempre mate lakan nune’e difikulta atividade negosiante sira.
“Populasaun kumpre ona sira-nia dever hodi selu ahi eletrisidade maibé oras ne’e ahi eletrisidade mate dalaruma to’o 24 oras bele fó impaktu ita-nia negosiante sira ne’ebé fa’an ikan no ayam potong tau iha jelera bele estraga de’it,” Lemos da Silva hateten ba Agência Tatoli via telefónika, segunda ne’e.
Notísia relevante: EDTL Viqueque Hetan Difikuldade ba Kombustivel
Nia husu ba tékniku sira bainhira eletrisidade avara iha fatin ruma tenke hadi’a lalais nune’e labele prejudika atividade sira.
Iha fatin ketak, Administradór postu Uatucarbau, Alfredo dos Santos, dehan, ahi eletrisidade ne’ebé mate lakan sai preokupasaun ba abitante lokál sira tanba kondisaun ne’e akontese durante kalan ida tomak.
“Tékniku EDTL, E.P presiza halo kontrolu atu nune’e eletrisidade labele mate beibeik. Eletrisidade ne’ebé mate lakan la’ós ha’u mesak maka preokupa maibé populasaun Uatucarbau tomak. Horiseik mate ohin meiu dia maka lakan fali. Ida-ne’e hamate mós negosiante sira-nia atividade negósiu,” nia lamenta.
Jornalista : Vitorino Lopes da Costa
Editora : Julia Chatarina
