ATAÚRU, 06 maiu 2023 (TATOLI)- Partidu Polítiku ho númeru sorteiu 13, Centro Ação Democrática Timorese (CASDT) hakarak atu harii universidade no sentru formasaun atu joven sira bele asesu edukasaun formál no naun-formál iha munisípiu Ataúru ho objetivu prinsipál atu joven sira bele promove abilidade no koñesimentu iha setór turizmu no peska.
Prezidente Interinu Partidu CASDT, Isaac do Rosário hateten, CASDT iha programa prinsipál ida atu promove juventude sira, hodi hasa’e sira nia abilidade iha setór turizmu no peska, hodi dezenvolve liutan setór turizmu no peska iha munisípiu Ataúru.
“Ita hakarak atu harii universidade no sentru formasaun ida iha munisípiu Ataúru atu promove joven sira abilidade. Ita hakarak joven iha munisípiu Ataúru bele asesu ba edukasaun forma no naun-formál atu sira bele dezenvolve di’ak liutan setór turizmu no peska hodi kria serbisu hamutuk,’’ Prezidente Interinu Partidu CASDT, Isaac do Rosário hateten, iha nia intervensaun iha atividade mini kampaña iha suku Biquili, munisípiu Ataúru, sábadu ne’e.
Nia hatutan tan katak CASDT la aseita joven sai ba serbisu iha ema nia rain tanba ne’e CASDT iha atu fó apoiu ba joven sira hodi iha sira-nia moris.
Partidu sei tau atensaun tomak ba joven sira hodi bele hetan koñesimentu di’ak hodi prenxe iha merkadu nasionál no mós bele kria serbisu iha ba aan rasik iha ita-nia nasaun.
Partidu CASDT konsidera Joven nu’udar pilar importante ba dezenvolvimentu nasaun ida nian. Tanba nee, Partidu hakarak estabelese universidade no sentru formasaun atu joven sira bele asesu ba edukasaun formál no naun-formál.
Munisípiu Ataúru nu’udar illa ida hale’u husi tasi no illa espesiál tebes ho potensiál ba setór Agrikultura. Komunidade Ataúru mós haki’ak animál no mós kaer ikan hodi bele sustenta moris.
Vise-prezidente CASDT, Paul Valente, subliña, CASDT hakarak serbí povu ho fuan atu bele apoiu dezenvolve juventude sira-nia abilidade iha área turizmu no peska.
Partidu CASDT husu ba komunidade Ataúru atu vota ba partidu atu bele realiza programa sira CASDT trasa ona iha tinan lima oin mai.
Valente husu ba povu Ataúru tomak atu vota ba partidu CASDT ho númeru sorteiu 13 atu fó konfiansa ba Partidu atu bele realiza programa sira ne’ebé favoravel ba juventude iha munisípiu Ataúru no Timor-Leste laran tomak.
Iha atividade mini kampaña ne’ebé hala’o husi Centro Ação Democrática Timorese (CASDT) no númeru sorteiu 13 akompaña husi membru CNE, observadór husi JPIC, no apoiu seguransa husi membru Polísia Nasionál Timor-Leste (PNTL) munisípiu Ataúru.
Mini Kampaña ne’e realiza ona tuir oráriu komisaun Nasionál Eleisaun (CNE) iha aldeia Palan, suku Bequili, munisípiu Ataúru no partisipa sira militante no simpatizante hamutuk liu 20.
Jornalista : José Belarmino De Sá
Editora : Nelia Borges
