MANUFAHI, 09 maiu 2023 (TATOLI) – Uma-kain 115 no to’os iha aldeia Kolkau, Postu administrativu Alas, Munisípiu Manufahi afeta husi Mota Laklo tanba kauza husi udan-boot ne’ebé tau durante loron hirak liubá.
Husi Uma-kain 115 ne’e, 24 mak hetan kondisaun grave enkuantu seluk ho kondisaun kmaan.
Xefe Suku Uma-Berloic, Bernardo Flores, hateten, situasaun ne’e sempre akontese bebeik tanba la iha barrajen.
“Mota ne’e mai la’ós foin agora maibé kada tinan sempre akontese, tanba mota ne’e laiha barajen, hakarak ka lakohi ami husu ba Governu sentrál atu mai halo lalais barajen ne’e,” Xefe Suku ba jornalista sira, tersa ne’e.
Líder komunitáriu ne’e dehan, entidade Manufahi hamutuk ho Autoridade Protesaun Sívil (APC, sigla portugés) Munisípiu Manufahi konsege muda ona komunidade balun ba iha fatin seguru no kontinua nafatin lori ba fatin seguru.
Komunidade afetada sira, parte APC no Xefe Suku apoia ona hahán atu sira bele konsumu hodi aguenta moris tanba sasan estragu totál.
Iha fatin hanesan, Vítima Argão Casimiro haeten, sente triste tanba dezastre ne’e la’ós foin akontese maibé kada tinan sempre mosu maibé Governu só tulun hahán maibé lakohi atu normaliza mota ne’e.
“Ami akontese nune’e, Estadu so fó apoiu mak fos, supermi buat sira ne’e ami bele hola hela maibé ami nia preokupassun mak mota ne’e, tenke mai halo lalais bronjon para satan netik mota ne’e di’ak ona,” nia preukupa.
Abitante ne’e hatutan, mota ne’e la’ós estraga de’it uma maibé estraga mós to’os komunidade nian hanesan hudi, batar no ai-farina.
Jornalista: Hortencio Sanchez
Editór : Zezito Silva
