DILI, 18 maiu 2023 (TATOLI) – Prezidente Partidu Kongresu Nasionál Rekonstrusaun Timor-Leste (CNRT), Kay Rala Xanana Gusmão, husu jerasaun foun, iha kampaña ikus partidu nian iha Tasi Tolu, atu prepara-aan hodi simu fali estafeta nasaun ida ne’e nian.
“Ha’u katuas ona maibé tanba interese Estadu no povu ida ne’e, ha’u prontu kandidata-aan hodi asume fali knaar nu’udar Primeiru-Ministru atu hadi’a rai doben ida ne’e molok ha’u entrega ba povu no jerasaun foun sira iha futuru”, Xanana afirma.
Prezidente partidu ne’e salienta bainhira atu fó tutan Estadu direitu demokrátiku ida ne’e ba jerasaun foun sira, nia lakohi husik nune’e de’it, maibé nia responsabilidade boot ida maka tenke hadi’a uluk ai-riin haat ne’ebé naksobu tiha ona, nune’e jerasaun kontinuador sira bainhira asume fali knaar ida ne’e hodi hatutan bá futuru.
“Bainhira ha’u atu fó tutan Estadu ida ne’e ba imi, ha’u hakarak Estadu ida ne’ebé moos no di’ak tanba ne’e imi hili ha’u ba tinan lima ne’e. Ha’u husu mai ita hamutuk hadi’a tiha buat sira ne’ebé ladi’ak atu nasaun ne’e bele sai fali país ida soberanu ho loloos”, nia realsa.
Xanana relembra esforsu ida ne’ebé halo ona atu salva Estadu ida ne’e maka povu hotu hamutuk ho CNRT fó ona vitória ba José Ramos Horta hodi sai Prezidente Repúblika iha tinan kotuk. “Maibé haree bá-mai ida ne’e de’it mós seidauk to’o tanba presiza tan governasaun ida di’ak atubele dezenvolve nasaun ne’e. Governasaun ne’e tenke hetan asentu boot iha Parlamentu Nasionál atubele sai Governu ida forte hodi hadi’a ai-riin tolu, Parlamentu, Governu no Tribunál, ne’ebé sei nakdoko hela ne’e”, katak.
Prezidente CNRT ne’e husu ba populasaun iha territóriu atu labele hili sala, tanba hakarak hetan mudansa ba tinan lima mai, nia tempu no oportunidade mak agora ne’e. Nune’e Xanana konvida ema hotu atu vota ba CNRT no lori partidu manán maioria absoluta hodi iha podér bele hadi’a nasaun ne’e.
“Kuandu desizaun ikus maka la tuir alvu ne’ebé iha, CNRT sei laiha forsa atu hadi’a nasaun ida ne’e. Tanba esperiénsia hatudu ona bainhira partidu ida la manán maioria absoluta, nia tenke bolu fali partidu ida seluk mai hamutuk hodi forma Governu, ikus mosu proposta lubuk hosi partidu koligasaun iha governasaun ne’e. Entaun, saida maka akontese maka hamosu konfuzaun, envéz atu hanoin hadi’ak povu nia moris, maibé Governu ida preokupa fali ho problema fahe kadeira”, Xanana refere.
Nune’e maka Xanana afirma CNRT ninia pozisaun katak iha eleisaun parlamentár 2023 ne’ebé sei realiza iha loron 21 maiu ema hotu tenke vota ba CNRT atubele forma Governu hodi hadi’a tiha problema nasaun nian ne’ebé durante ne’e akontese iha órgaun tolu ne’ebé to’o agora seidauk hatuur fali tuir Konstituisaun RDTL.
Jornalista: Tomé Amado
Editora: Maria Auxiliadora
