DILI, 31 maiu 2023 (TATOLI) – Reprezentante Organizasaun Mundial Saúde iha Timor-Leste, Arvind Mathur, hateten Organizasaun Mundial Saúde (OMS) iha planu atu apoiu nafatin Governu foun ho objetivu atu estende servisu hapara fuma iha munisípiu hotu.
“Ami iha planu atu la’o hamutuk ho Ministériu Saúde liuliu Governu foun oinsá atu estende tan servisu hapara fuma tanba agora iha munisípiu lima ita estabelese ona, entaun ita hakarak munisípiu hotu tenke estabelese fatin atu komunidade sira ne’ebé mak hakarak hapara fuma, médiku sira bele halo atendimentu ba sira”, Arvind Mathur informa ba TATOLI, ohin.
Nia dehan, Timor-Leste estabelese ona sentru hapara fuma iha fatin lima, hanesan Dili, Liquisa, Ainaro, Ermera no Oe-cusse. Tanba ne’e, ba oin tenke estende tan ba munisípiu sira seluk ne’ebé mak sentru hapara fuma seidauk iha.
“Ita harii sentru hapara fuma ida ne’e hodi redúz ema fuma atu labele afeta ba moras tanba ema ne’ebé fuma bele hamosu kankru ba nia isin, hanesan kankru ibun, respirasaun, sirkulasaun raan, ikus bele afeta ba fuan”, nia esplika.
Nia subliña, ema ne’ebé fumadór, besik liu ema ne’ebé mak la fuma, tuir dadus hatudu katak ema na’in-ualu to’o ema na’in 10 mak horon sigaru suar hodi afeta ba nia saúde.
“Ema ne’ebé la fuma maibé besik ema ne’ebé fuma bele afeta moras tanba dadus hatudu katak ema nai’n ualu husi ema na’in 10 hetan sigaru suar bainhira hamrik besik malu”, nia afirma.
Jornalista : Felicidade Ximenes
Editór : Zezito Silva
