BOBONARO, 06 juñu 2023 (TATOLI)-–ABC-International Development (ID) serbisu hamutuk ho Konsellu Imprensa (CI, sigla portugés) hodi dezenvolve mídia iha Timor-Leste, iha área importante tolu hanesan kapasitasaun, peskiza no dezenvolvimentu mata-dalan.
“Kapasitasaun katak sei realiza formasaun ba jornalista sira ein termu peskiza nian. Konsellu Imprensa serbisu hamutuk ho ABC-ID atu halo peskiza ruma iha Timor, kona-ba dezenvolvimentu mata-dalan Konsellu Imprensa halo ona rua hanesan violénsia bazeia ba jéneru no eleisaun, maibé apoia ida-ne’e sei foka ba jornalizmu inkluzivu,” Diretór Ezekutivu CI, Rigoberto Monteiro, hateten iha ámbitu asina akordu, ne’ebé hala’o iha Pouzada Balibo, postu administrativu Balibo, munisípiu Bobonaro, tersa ne’e.
ABC-ID nu’udar mídia ne’ebé kontribui ba Timor-Leste nia prosesu luta libertasaun nasionál, nune’e sira mós iha responsabilidade atu kontribui ba dezenvolvimentu mídia iha Timor.
“Bainhira ami hasoru malu iha fulan hirak ba kotuk, ami informa ba sira kona-ba importánsia saida mak mídia Timor-Leste presiza entaun sira deside fó apoia,” nia akresenta.
Notísia relevante : SEKOMS no MTK realiza semináriu nasionál dezenvolvimentu mídia plataforma dijitál
Projetu ne’e sei realiza durante fulan-neen, hahú hosi asinatura akordu to’o 31 dezembru 2023, ho orsamentu hamutuk $53.000.
Iha biban hanesan, Prezidente CI, Otelio Ote, agradese ba ABC-ID ne’ebé mak hala’o kooperasaun dahuluk ho Konsellu Imprensa.
“Austrália no Timor-Leste hamutuk atu hanoin buat di’ak ida ba futuru jornalizmu no mídia ba rai rua, Timor-Leste foin ukun-an tinan 21, ami luta maka’as desde inísiu kedas to’o agora atu mídia ne’e eziste nafatin atu mundu bele rekoñese katak Timor nia demokrasia kontinua moris no buras,” Prezidente CI dehan.
Nia konsidera, asinatura akordu kooperasaun ne’e signifika dezenvolvimentu mídia no jornalizmu buras.
“CI la’ós parseria de’it ho Austrália maibé ho nasaun seluk ho objetivu atu hametin téknika jornalista, haburas profisionalizmu no halo inteletualidade iha komunidade mídia kroat liután,” Otelio Ote otimista.
Nune’e mós, Prezidente ABC-ID, Jo Elsom, orgullu iha oportunidade bele serbisu hamutuk ho Konsellu Imprensa Timor-Leste.
“Ita iha istoria barak iha rai Balibo, ami apresia ho demokrasia iha Timor-Leste, bainhira ami serbisu iha Timor-Leste, maski ami mesak maibé ita apreende hamutuk,” Jo Elsom rekoñese.
Nia dehan, ABC-ID prontu atu serbisu hamutuk ho CI hodi dezenvolve mídia Timor-Leste no iha kompromisu boot apoia Timor-Leste iha futuru.
Hafoin selebra akordu, Prezidente CI ho ekipa akompaña ekipa ABC-ID hala’o vizita ba fatin istóriku ne’ebé jornalista australianu na’in-lima mate.
Serimónia ne’e partisipa hosi Konselleiru no funsionáriu CI balun, ekipa ABC-ID, akompaña mós hosi Administradór postu Balibo, Amílcar Tavares.
Jornalista : Antónia Gusmão
Editora : Julia Chatarina
