HEADLINE, KAPITÁL, NASIONÁL

SEKOMS no MTK realiza semináriu nasionál dezenvolvimentu mídia plataforma dijitál

SEKOMS no MTK realiza semináriu nasionál dezenvolvimentu mídia plataforma dijitál

Semináriu nasionál dezenvolvimentu mídia plataforma dijitál agora no futuru iha Timor-Leste, iha salaun Suai Room Timor-Plaza, segunda (15/08). Imajen Tatoli/Francisco Sony

DILI, 15 agostu 2022 (TATOLI)—Sekretaria Estadu Komunikasaun Sosiál (SEKOMS) no Ministériu Transporte no Komunikasaun (MTK), segunda ne’e, realiza semináriu nasionál ho tópiku dezenvolvimentu mídia plataforma dijitál agora no futuru iha Timor-Leste.

Sekretáriu Estadu Komunikasaun Sosiál, Merício Juvinál Dias dos Reis ‘Akara’, hateten, objetivu semináriu ne’e atu fasilita oradór sira atu fahe informasaun kona-ba dezenvolvimentu dijitál iha Timor-Leste.

“Agora era dijitál, mídia konvensionál sira agora transforma ba ona mídia dijitál, entaun Governu hanoin tempu ona ita tenke diskute beibeik kona-ba meiu komunikasaun foun ne’e tanba iha mundu agora mídia dijitál ne’e oferese buat hotu, iha pozitivu no negativu. Kultura foun dijitál ne’e oportunidade di’ak ba sidadaun hotu hodi bele utiliza maibé tenke ho hanoin utiliza ho matenke no edukativu,” Sekretáriu Estadu Akara, hateten iha Suai Room, Timor Plaza.

Notísia relevante: SEKOMS lansa rezultadu relatóriu persepsaun públiku ba mídia nasionál Estadu-privadu

Nune’e, liuhosi semináriu ne’e bele halibur ideia no diskute opsaun saida mak tenke utiliza ba oin no konteúdu saida mak kontribui halo barak liu iha notísia no mídia dijitál sira. Objetivu seluk hosi semináriu  mak  bele rona pespetiva públiku, akadémiku no mídia sira kona-ba knaar kontribuisaun atu promove literasia dijitál iha Timor-Leste atu ema iha kapasidade utiliza mídia dijitál sira nune’e mós oinsá atu promove internet saudável no pozitivu, tanba semináriu ne’e toka mós ba internet karun, lentu no seidauk asesu ba fatin hotu.

“Governu iha kompromisu atu dezenvolve infraestrutura hodi fasilita mídia dijitál ho lalais, baratu no bele asesu ba ema hotu. Mídia ida-idaik tenke atualiza-an hodi ajusta meiu sira tanba mídia konvensionál sira la adapta-an ba lee na’in sira bele dada-an,” governante ne’e tenik.

Dezafiu setór telekomunikasaun

Iha fatin hanesan, Ministériu Transporte no Komunikasaun, José Agostinho, hateten, iha semináriu ne’e lori temátiku kona-ba ‘Rede fibra ótika nasionál infraestrutura estratéjiku ba dezenvolvimentu ekonomia iha Timor-Leste’.

Konteúdu aprezentasaun ne’e ko’alia kona-ba dezafiu setór telekomunikasaun, polítika setór telekomunikasaun, infraestrutura telekomunikasaun, Timor-Leste South Submarine Cable (TLSSC), konekta sira ne’ebé deskonetadu no papél setór telekomunikasaun.

“Ita-nia dezafiu setór telekomunikasaun atuál maka internet lentu, presu karun, rede monu beibeik, no populasaun balun seidauk konekta, ninia solusaun mak ita tenke iha investimentu infraestrutura, kria kompetisaun iha merkadu, reforsa servisu reguladora, no programa asesu universál,” nia hato’o.

Polítika setór telekomunikasaun nia meta no planu mak ema liga timor-oan no mundu, ekonomia sustentável, negósiu, kresimentu ekonómiku, no Governu servisu públiku ba populasaun, enkuantu ba planu mak merkadu kompetetivu, reguladora indepedente mak agora Autoridade Nasionál Komunikasaun (ANC, sigla portugés) no investimentu iha infraestrutura.

Telekomunikasaun rede backbone nasionál, implementasaun programa Governu nia mak TLSSC, rede backbone fibra ótika OPGW, no projetu konetividade nasionál.

Tuir dadus, hahú hosi tinan 2005 to’o 2019 konekta sira ne’ebé deskonektadu 49% hosi populasaun mundu ka pur volta biliaun 3,7 individuál sei offline ka eskluindu hosi benefisiu ekonomia dijitál globál iha tinan 2019 nia rohan.

“Ba ita-nia nasaun Timor-Leste konekta sira ne’ebé deskonektadu iha tinan 2015, área populasaun koberadu ba rede telemóvel ne’e 96%, maibé ba tinan 2030 internet bele konekta ona ba Timor laran tomak,” nia dehan.

Papél telekomunikasaun mak infraestrutura no servisu telekomunikasaun asume knaar hanesan ponte no estrada ba setór sira seluk, nune’e telekomunikasaun fasilita dezenvolvimentu nasionál no promove kresimentu ekonómiku.

Aleinde ne’e, Governu investe infraestrutura estratéjiku telekomunikasaun nu’udar ponte no estrada dijitál ba lala’ok ekonomia dijitál nasaun nian.

Nune’e mós, Prezidente Konsellu Imprensa, Virgílio Guterres, ne’ebé iha serináriu lori temátiku ’Dezenvolvimentu relasaun ho liberdade imprensa no liberdade espresaun iha Timor-Leste’, dehan, era globál ne’e presiza benefísiu dijitál barak.

Kona-ba dezenvolvimentu dijitál sai hanesan parte integrál ho sosiedade modernu. Planu Governu kona-ba programa Governu nia mak TLSSC ne’e di’ak tanba sei ajuda oferese internet ne’ebé di’ak.

“Ita lori kabu submarinu ne’e mai laiha polítika di’ak atu implementa sei hanesan tali ne’ebé kesi ita-nia kakorok, entaun edukasaun ne’e xave importante liuliu ba kurríkulu sira,” nia akresenta.

Dezafiu boot mak bainhira edukasaun laiha, informasaun hotu sei tau iha dijitál la ho resposabilidade.

“Hein katak fibra ótika molok to’o mai ita-nia sosiedade tenke preparadu, formadu no edukadu di’ak,” nia tenik.

CI rasik antes ne’e prodús ona manuál ida ba jornalista sira oinsá uza sira-nia konta sosiál mídia ho responsabilidade.

“Jornalista hetan ona karteira profisionál, tenke mantein profisionalizmu la’ós de’it iha nia notísia, maibé hakerek, opiniaun, sosiál mídia, hahalok iha sosiedade hatudu profesionalizmu, nune’e jornalista mós apoiu fahe informasaun ne’ebé responsável ba ita-nia sosiedade, atu ita labele sai fali fake news iha sosiedade,” nia fó hanoin.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!