DILI, 03 agostu 2022 (TATOLI)—Sekretaria Estadu Komunikasaun Sosiál (SEKOMS), kuarta ne’e, halo lansamentu prelimináriu ba rezultadu relatóriu persepsaun públiku ba mídia nasionál Estadu no privadu sira iha Timor-Leste.
“Lansamentu ohin ba dala-rua, survey ida-ne’e ita hala’o hahú hosi janeiru to’o juñu ho objetivu la’ós atu fó negativu ba ita maibé bele ajuda ita atu hadi’a ita-nia an di’ak liután atubele serví ita-nia leitór sira ho másimu no kualidade,” Sekretáriu Estadu Komunikasaun Sosiál, Merício Juvinal Dias Reis ‘Akara’, hateten, iha salaun Prezidénsia Konsellu Ministru (PCM, sigla portugés) Palásiu Governu, kuarta ne’e.
Persepsaun públiku ne’e dalan ida atu fasilita no tulun kada instituisaun mídia sira ne’ebé servisu iha área komunikasaun atu hatene didi’ak ninia forsa, frakeza no bele hatene públiku ninia hakarak no akompaña ba informasaun hosi mídia ne’e to’o ona iha nível ne’ebé, hakarak liu akompaña asuntu saida no gosta.
“Bainhira mídia hatene ona públiku ninia hakarak, bele fahe informasaun ne’ebé di’ak no kredível ba ita-nia públiku atu sira iha kapasidade akompaña dezenvolvimentu nasionál no kontribui ba dezenvolvimentu nasaun nian, inklui sai sidadaun ne’ebé di’ak no saudável,” nia akresenta.
Notísia relevante: Rezultadu survey SEKOMS, maioria públiku gosta akompaña informasaun polítika nasionál
Iha serimónia ne’e, Responsável peskiza persepsaun públiku mídia nasionál, Carsiliano Oliveira, hateten, objetivu hosi atividade ne’e atu sukat komunidade ninia interese ba asesu informasaun hosi mídia Estadu no privadu hanesan televizaun, rádiu no jornál sira iha nasionál no munisípiu.
“Atu hatene públiku ninia preferénsia ba fornesimentu informasaun hosi mídia Estadu no privada sira, sukat komunidade nia konfiansa ba fonte informasaun hosi plataforma mídia komunikasaun hanesan mídia konvensionál dijital sosiál no seluk tan,” nia esklarese.
Durante survey ba persepsaun públiku, foti maiória parte ne’e joven idade entre 17 to’o 30 tanba fasil atu halo komunikasaun, no hosi peskiza ne’e jeralmente haree katak komunidade ne’ebé loron-loron uza mídia komunikasaun asesu ba informasaun ne’e hatudu kuaze 78,48%, fonte informasaun ne’e hatudu komunidade uza mídia sosiál hanesan facebook ne’e hamutuk 47,88%, televizaun no rádiu 21%.
Komunidade ne’ebé lee jornál, ekipa survey tenta husu komunidade asesu ne’e ba diáriu nasionál 38%, timor post 22,3%, Suara Timor Lorosa’e 10% Jornál Indepedente 13%, Dili Post 12%.
Pesepsaun komunidade nian kona-ba rona rádiu mak sira prefere liu rona barak mak rádiu Rádiu Televizaun Timor-Leste (RTTL) 55,76%, rádiu Komunidade 21%, RTK 3,31%, rádiu Liberdade 2,29% rádiu Maubere 4,15%, rádiu GMN 10,85%, rádiu Parlamentu Nasionál 2,46%.
Kona-ba públiku asesu ba televizaun komunidade asesu maioria RTTL 50%, GMN-TV 30%, STL-TL 2,46%, TV Maubere 1,78%,TVE 4,49%, Gardamor TV 0,93% no Parabola-K. estranjeiru 9,66%.
Kona-ba públiku nia asesu ba kanál mídia online, Agência Tatoli okupa númeru ida ho 31,53%, Tempo Timor 5,51%, STL 4,83, GMN-TV 28,56%, Timor Post 4,83%, RTTL 24,57%.
Nune’e, iha peskiza ne’e mós komunidade nia asesu tópiku informasaun hanesan, polítika, ekonómia, sosiál, kultura, krimináll no seluk tan ne’e, públiku akompaña barak liu ne’e polítika nasionál ne’e domina 37,37%.
Iha Fatin hanesan, Prezidente Conselho Imprensa (CI, sigla portugés), Virgílio da Silva Guterres, agradese ba SEKOMS ne’ebé iha inisiativa halo presepsaun públiku nia akompañametu ba mídia sira iha Timor-Leste.
“Liuhosi meiu ida-ne’e atu fasilita ita oinsá hadi’a ita-nia kualidade,” nia hateten.
Jornalista : Arminda Fonseca
Editora : Julia Chatarina
