VIQUEQUE, 12 jullu 2023 (TATOLI)—Servisu Ministériu Agrikultura no Peska (MAP) Viqueque identifika irrigasaun haat hetan estragu kauza dezastre naturál ne’ebé akontese foin lalais ne’e.
Diretór Servisu MAP Viqueque, Fernando Joaquim, hateten, irrigasaun ne’ebé hetan estragu mak hanesan Baidubu, Irabere no Nahabo iha postu Uatucarbau, ne’ebé fornese bee ba natar ektare 64 no irrigasaun ida iha suku Bahalara Uain postu Viqueque Vila, fornese bee ba natar ektare 195,5 iha área Uelaku.
“Udan-boot foin lalais ne’e estrga irrigasaun haat, nune’e agora labele distribui bee ba natar. Ita haree agora tempu udan ne’e maka bee sei iha natar laran, maibé bainhira udan para, komunidade sira-nia hare bele mate hotu,” Diretór Servisu munisipál informa ba Agência Tatoli, iha postu Viqueque Vila, kuarta ne’e.
Notísia relevante : Irrigasaun Daradau iha suku Vessoru Viqueque funsiona ona ba natar ektare 340
Nia dehan, mota mak estraga irrigasaun sira, tanba ne’e daudaun Servisu MAP Viqueque prepara ona pedidu ba Governu sentrál hodi hetan apoiu ekipamentu hodi halo normalizasaun.
“Agora ami prepara ona relatóriu kona-ba irrigasaun sira ne’ebé foin lalais mota estraga hodi relata ba nasionál atu hadi’a,” nia akresenta.
Jornalista : Vitorino Lopes da Costa
Editora : Julia Chatarina
