DILI, 13 jullu 2023 (TATOLI) – Prezidente Komisaun Funsaun Públika (KFP), Faustino Cardoso, hein IX Governu bele loke fali diskusaun ba lei reforma obrigatória ne’ebé mak Ezekutivu anteriór lakonsege konklui no halo elaborasaun téknika ba definisaun lei refere iha loron 180 nia laran.
Faustino Cardoso lembra katak Parlamentu Nasionál (PN) iha kinta lejislatura halo ona aprovasaun ba lei reforma obrigatóriu ba Funsaun Públika no iha loron 19 fevereiru lei ne’e hahú vigora no fó tempu loron 180 ba VIII Governu atu konklui elaborasaun téknika ba definisaun idade efetiva iha serbisu Funsaun Públika nian, maibé molok tama ba eleisaun Parlamentár, Ezekutivu anteriór retira tiha sira-nian ajenda atu halo diskusaun kona-ba proposta dekretu-lei ligadu ho definisaun idade ba reforma nian.
“Ita la hatene maibé ne’e desizaun polítika no prosesu mak tuir mekanizmu ne’ebé haktuir ba ita-nian sistema polítika no jurídika kuandu Governu ida ninia proposta la konsege implementa ona, entaun konsidera inválidu ou kadukadu. Entaun, lei sira ne’e filafali ba inísiu hodi halo foun nia diskusaun”, Faustino Cardoso dehan iha Vila Verde.
Dirijente Funsaun Públika hatutan katak tanba Governu Daualuk la konsege kria diskusaun atu define ho loloos idade reforma iha lei obrigatóriu ne’e maka KFP hein iha mandatu IX Governu nian bele iha responsabilidade atu oinsá maka hatuur fali prioridade hodi haree fali lei refere.
“Karik atu kontinua ho mekanizmu ida uluk VIII Governu nian, entaun tenke hato’o fali proposta lei pedidu autorizasaun lejislatura ba iha PN hodi bele hahú halo diskusaun no aprovasaun hodi fó biban ba Governu atu avansa ho téknika liuhusi proposta dekretu-lei. KFP prontu atu implementa bainhira proposta dekretu-lei ligadu ho definisaun idade efetiva serbisu iha Funsaun Públika aprova ona”, salienta.
Faustino realsa katak se lei ne’e seidauk iha maka atu tama ba reforma depende ba konsiénsia indívidu funsionáriu sira-nian, tanba ema ida-idak mak bele foti desizaun rasik no la hein Estadu atu promove reforma ne’e.
“Karik funsionáriu ida maka sente ninia saúde la permite ona [halo knaar] ho idade 60 ba leten, bele hato’o rekerimentu reforma ba KFP atu prosesu sira-nia pedidu ne’e hamutuk ho Institutu Nasionál Seguransa Sosiál. Iha kontestu reforma iha Funsaun Públika nia baze legál atu obriga ema tenke reforma ne’e seidauk iha, tanba ne’e reforma ne’ebé maka foin lalais akontese iha instituisaun Polísia Nasionál Timor-Leste ne’e sei uza hela prosesu reforma anteriór nian”, katak.
Tuir dadus KPF, Timor-Leste rejista 36.557 funsionáriu (27.641 permanente no 8.916 kontratadu), iha ne’ebé 3.388 sei ativu ne’e iha ona idade reforma, ida ne’e, iha tinan 60 ka liu.
Funsionáriu idade reforma ne’ebé pertense maioria ba rejime karreira espesiál ne’e hamutuk 2.359, husi númeru ne’e 2.050 mai husi Ministériu Edukasaun, 251 husi Saúde no restante 58 husi instituisaun seluk.
Notísia relevante: KFP rekoñese lei reforma ba funsionáriu públiku sei iha prosesu
Jornalista: Tomé Amado
Editora: Maria Auxiliadora
