DILI, 25 jullu 2023 (TATOLI)—Primeiru-Ministru, António Costa halo vizita ofisiál ba Timor-Leste, tersa ne’e no iha biban ne’e halo enkontru bilaterál ho Primeiru-Ministru, Kay Rala Xanana Gusmão hodi komprimenta no diskute kona-ba akordu ne’ebé país rua sei halo.
“Agradese tebes ba Primeiru-Ministru António Costa, hakarak hateten katak ne’e nu’udar vizita ida espesiál tebes, tanba iha inísiu mandatu ha’u-nia governasaun, iha ne’e Primeiru-Ministru António Costa ko’alia kona-ba planu kooperasaun tinan 2024-2028, tanba ne’e ba oin ita sei nafatin iha kontaktu hodi asina akordu sira ne’ebé sei tau iha planu prioridade, loos duni katak amizade sempre kontinua hodi nune’e povu Timor-Leste sente ukun rasik-an ne’e iha ninia valór,” Xanana hateten liuhosi konferénsia imprensa konjunta, iha Palásiu Governu.
Notísia relevante : Primeiru-Ministru Portugal António Costa sei vizita Timor-Leste
Iha biban hanesan, Primeiru-Ministru Portugal, António Costa, konsidera vizita ne’e nu’udar vizita amizade ida.
“Hakarak komprimenta Primeiru-Ministru Xanana Gusmão, ne’e hanesan oportunidade ida hodi mai hasoru malu ho Xanana Gusmão, nia nu’udar lutadór ba independénsia Timor-Leste nian. Vizita ne’e nu’udar momentu importante tanba ho Governu foun ha’u mak nu’udar Primeiru-Ministru dahuluk mai vizita, tanba ne’e hakarak agradese ba Xanana fó oportunidade ba ha’u hodi mai vizita iha inísiu formasaun Governu,” Xefe Governu Portugal tenik.
Portugal hakarak apoia Timor-Leste implementa programa prioridade sira iha área balun.
“Iha vizita ne’e ami ko’alia kona-ba preparasaun programa estratéjiku kooperasaun entre tinan 2024-2028 hodi korresponde ba prioridade Governu Timor nian, ne’ebé presiza implementa ka realiza durante mandatu,” nia subliña.
Primeiru-Ministru, António Costa to’o iha Palásiu Governu, simu hosi ninia omólogu akompaña hosi membru Governu sira, hafoin ne’e realiza kedas parada militár hodi fó onra ba Xefe Governu Portugal no iha momentu ne’e ekipa hananu hinu nasionál Portugal no Timor-Leste nian, hafoin ne’e António Costa hala’o pasa revista ba formatura militár akompaña hosi Xanana Gusmão.
Jornalista : Antónia Gusmão
Editora : Julia Chatarina
