DILI, 02 agostu 2023 (TATOLI)–Komandante Jerál Polísia Nasionál Timor-Leste (PNTL), Komisáriu Jerál Henrique da Costa, hateten, parte Komandu lakohi interven ba desizaun ne’ebé Ministériu Interiór (MI) foti ba membru na’in-158 ne’ebé reforma ona no fila ba vida sivíl.
“Komandante Jerál hasai ona despaixu iha fulan hirak liubá atu nune’e membru hirak ne’ebé liu ona idade reforma bele ba ona reforma, maibé agora iha filafali Ministériu Interiór halo prosesu seluk ruma, Komandu lakohi interven ba servisu ne’ebé ministériu halo, ne’ebé ita akompaña hamutuk,” Komisáriu Jerál Henrique da Costa hateten hafoin relata situasaun jerál ba Xefe Estadu, iha Palásiu Prezidensiál, Bairru-Pité, kuarta ne’e.
Notísia relevante : MI sei revé fali lei reforma PNTL
Aleinde ne’e, Komandu seidauk bele halo konkluzaun kona-ba posibilidade Komandu simu membru reformadu sira hanesan membru ativu tanba desizaun ne’ebé Governu anteriór no Komandu PNTL foti bazeia ba lei no estatutu Polísia númeru 69/2022.
“Ita labele halo uluk konkluzaun katak membru reformadu hirak ne’e karik desizaun oinsá mai fali sai membru ativu PNTL, ne’e Komandu bele simu fali sira ka labele simu, ita hein prosesu ne’e hosi parte ministériu nian depois mak ita haree, maibé desizaun ne’ebé Komandu foti hodi reforma membru na’in-158 ne’e bazeia ba lei hanesan estatutu PNTL, karik ida-ne’e mak la loos hatudu fali ida loloos mai para ita hatene,” nia akresenta.
Antes ne’e, Ministru Interiór, Francisco Guterres, hateten katak sei halo revizaun ba estatutu PNTL hodi dignifika membru sira ne’ebé sei tama iha vida reforma.
Jornalista : Antónia Gusmão
Editora : Julia Chatarina
