DILI, 01 jullu 2023 (TATOLI)-Ministru Interiór (MI), Francisco Guterres hateten, hanesan MI foun sei revé fali lei reforma membru Polísia Nasionál Timor-Leste (PNTL), hodi fó onra, trata dignu ba PNTL molok pasa ba reforma.
“Agora ha’u tama ba mak ita haree e to’ok lei reforma ne’ebé mak sira (PNTL) iha ne’e, regras ne’ebé mak sira iha depois mak ita halo analiza kle’an ida kona-ba lei ou regra sira ne’ebé mak sira tau ne’e, para depois ita re-organiza, revé fila fali lei sira ne’e para depois ita hamosu fali buat ideál ida para depois ita responde ba nesesidade polísia nian,” Francisco Guterres hateten ba jornalista sira hafoin simu pose hanesan Ministru Interiór foun iha Palasiu Prezidensiál, Aitarak-Laran, sábadu ne’e.
Ezekutivu ne’e rekorda, polítika reforma ne’e hahú iha 2007, iha mandatu IV Governu Konstitusionál, halo reforma ida PNTL, halo reforma setór seguransa ne’ebé maka’as to’o iha 2015, no agora daudaun kontinua para hadi’a di’ak liután mentalidade servisu disipliña profisionál polísia nian, atu serve rai ida ne’e di’ak liután.
Tanba ne’e, Ministru Interiór foun durante loron 100 presiza revé didi’ak lai lei liuliu reforma ideál ba PNTL.
“Tinan sira ne’e ami sei define didi’ak tinan reforma ba instituisaun polísia, para kuandu polísia sira ne’e ba reforma karik ho dignu, tanba kuaze sira-nia vida tomak fó hela ba polísia. Kuandu sira tama reforma ne’e ita tenke tau sira dignu, reforma ne’ebé ho di’ak para sira ne’e kuandu fila ba uma mós sente di’ak. Katak, sira-nia servisu ne’e la saugati, ida ne’e mak ita tenke halo primeiru, para ita haree oinsá mak ita lori sira fila fali ba iha komunidade ho digñu. Ita integra sira ba komunidade sira sira sente di’ak hela,”Governante ne’e realsa.
Ministru Interior, Francisco Guterres, konfirma, katak membru PNTL sira ne’ebé hamtuk 158 posibilidade sei fila fali mai toma sira nia servisu hanesan membru PNTL, tanba lei reforma ne’ebé foin Institusaun PNTL halo ne’e la nesesariu. Tanba membru barak lakohi asina dokumentu.
“Ita ba haree lei ne’e hanesan ohin Primeiru Ministru koalia katak reform aba PNTL ne’e tenke ita halo reforma ho di’ak. Reforma foin lalais PNTL halo no membru ne’ebé pasa ona ba reforma ne’e barak seidauk asina kualker dokumentu,” Nia informa.
Nia esplika, kuandu membru PNTL ida atu pasa ba reforma ne’e sira tenke voluntariu no asina dokumentu balun maibé foin dadaun reformadu sira seidauk asina kualker papél atu halo reforma.
“Portantu sira sei iha direitu mai fila fali para atu ita dehan hanesan ne’e reforma ideál ne’e imi nian mak tinan ida ne’e.eEntaun ita hamosu dekretu-lei ida, hamosu normas regras ida, lei ida para depois atu dehan sira prepara ba reforma,” Ministru Interior, Francisco hateten.
“Ha’u sei ba haree lei, tanba ha’u seidauk lé kona-ba sira nian prosesu ne’e rasik. Iha posibilidade sempre iha posibilidade, sira fila mai, tanba kualker situasaun kualker lei ne’ebé mak mosu ita haree tok sé nu kazu reforma ne’e seidauk bele fó dignidade, entaun ita seidauk beke halo reforma, tanba reforma ita tenke dignifika ba membru PNTL sira.Tanba ne’e, ita sei bele halo revizaun ba lei para depois re-organiza fila fali hodi prepara sira ba reforma importante,” nia adianta.
Governante ne’e seidauk simu karta ruma hosi membru PNTL reformadu.
“Ha’u hatene katak sira ne’e tenke presiza fó duni reforma, maibé ita tenke fó duni onra sira-nia servisu durante halo. Ita kuandu toba iha uma sira sei halo servisu iha estrada. Entaun fó onra ba sira-nia servisu ne’e, ita fó saida kuandu membru PNTL ba reforma ita tenke kria kondisaun ne’ebé dignu para sira reforma ho di’ak. Sé seidauk ita tenke re-organiza ho di’ak, ita tenke halo revizaun fali para hadi’a foin mak ita haruka sira ba reforma,” Francisco Guterres subliña.
Ministru Interiór, ne’e promete, durantenian servisu loron 100 nia laran sei haree hodi fó prioridade ba PNTL liuhosi re-organiza instituisaun polísia bele sai instisaun polísia hodi instituisaun PNTL bele sai instituisaun polísia ne’ebé profisionál hala’o servisu hodi servi tuir juramentu; jura ba bandeira no nasaun PNTL labele servi fali ema ida nia interrese.
“Ita hahú haree kona-ba kestaun servisu disipliaar polísia sira nian. Sira tenke la’o ho di’ak, sira tenke kumpri juramentu ba iha Estadu direitu demokrátiku katak, nia halo juramentu ne’e ba bandeira ida, ba nasaun ida. labele halo juramentu ba ema ida, ita sei re-organiza ida ne’e hodi tau iha dalan karik durante ne’e PNTL hanesan ne’e ita sei buka tuir hotu depois ita re-organiza hotu ida ne’e, para ita mai ne’e harii polísia ida profisionál, labele obedese ba ba ema ida.Tenke serve Estadu serve ba nasaun,” Nia konklui.
Jornalista: Natalino Costa
Editór: Rafael Ximenes de A. Belo
