DILI, 10 agostu 2023 (TATOLI) – Profesór na’in-40 husi eskola báziku 10 iha munisípiu Lautém, Manatuto no iha Rejiaun Administrativa Espesiál Oé-Cusse Ambeno (RAEOA) partisipa iha formasaun kona-ba metodolojia ensinu, liuhusi programa Edukasaun Multilinge (EMULI) atubele ajuda estudante sira iha prosesu aprendizajen.
Ministra Edukasaun, Dulce de Jesus, hatete implementasaun programa EMULI ne’e rasik realiza ona iha tinan sira anteriór no iha mandatu IX Governu kontinua tau importánsia, nune’e profesór sira bele hetan koñesimentu adekuadu hodi bele tulun labarik sira iha ensinu báziku.
Programa EMULI ne’e rasik hatuur ona iha planu Ezekutivu nian no sei implementa iha eskola 10 iha munisípiu rua no RAEOA no bainhira la’o ho di’ak bele espande tan bá eskola sira iha área remota.
Dulce de Jesus salienta katak programa ne’e rasik hatudu ona rezultadu tanba estudante sira iha eskola10 hatene ona hakerek ho di’ak, maibé presiza aplika métodu aprosimasaun ida di’ak.
Tuir planu ministériu nian, bainhira atu alarga tan programa ne’e bá eskola ida tenke halo preparasaun ida di’ak. Profesór sira tenke iha koñesimentu di’ak kona-ba oinsá atu aplika metodolojia no materiál didátiku sira tenke disponivel, nune’e iha prosesu implementasaun nia laran labele mosu problema.
Koordenadór eskola báziku Filiál Mahina 1 Lautém, Venâncio Xavier, haktuir katak programa Edukasaun Multilinge di’ak tebes tanba ajuda ona profesór sira bele uza metodolojia di’ak hodi hanorin estudante sira iha aula laran.
Daudaun ne’e manorin sira iha eskola rua iha Lautém hanesan Eskola Bázika Filiál Muapitine no Mahina maka hetan ona formasaun liuhusi programa edukasaun multilinge. Husi rezultadu ne’e hatudu katak maka alunu barak mak hatene lee no hakerek ho di’ak.
Venâncio Xavier rekomenda ba Ministériu Edukasaun katak programa EMULI ne’ebé hatudu ona progresu di’ak ne’e tenke espande bá eskola sira seluk, nune’e labarik sira bele aproveita oportunidade ne’e ho di’ak liután.
Jornalista: Tomé Amado
Editora: Maria Auxiliadora
