DILI, 16 agostu 2023 (TATOLI)—Sekretaria Estadu Formasaun Profisionál no Empregu (SEFOPE), liuhosi Diresaun Nasionál Empregu no Exteriór (DNEE), kuarta ne’e, fó sai katak aplikante 2.508 vaga online serbisu iha Austrália, sei tuir entrevista lian inglés, semana oin.
“Prosesu teste lian inglés ne’e hanesan parte ida hosi inísiu kandidatu sira ne’ebé pasa naran sei hatama ba sistema baze dadus diresaun nian ka rejistu ba sistema Work Ready Pool tuir prosesu Schem Pacific Australian Labor Mobility (PALM),”Diretór Nasionál Empregu no Exteriór, Filomeno Soares, hateten, liuhosi nota ne’ebé Agência Tatoli asesu, kuarta ne’e.
Notísia relevante : Aplikante vaga online Austrália na’in-2.500 hakat ba faze teste inglés
Kandidatu aplikante sira ne’ebé atu tuir prosesu entrevista lian inglés, aplika PALM semi-skilled 2023 hamutuk aplikasaun 55.346, maibé hafoin DNEE simu halo pre-screening ba kandidatu hamutuk 14.000 hodi ba faze dahuluk iha fulan juñu ne’ebé hetan selesaun 2.508.
Oráriu ba prosesu teste lian inglés hahú iha segunda semana oin 21 agostu to’o 06 setembru 2023, tuku 07:30 dadeersan.
Nia husu ba kandidatu sira ne’ebé naran sai ona atu tuir prosesu teste lian inglés ne’e tenke lori ho dokumentu sira hanesan kaderneta pasaporte no kartaun eleitorál.
Jornalista : Arminda Fonseca
Editora : Julia Chatarina
