DILI, 16 agostu 2023 (TATOLI)—Governu Timor-Leste sei kontribui orsamentu hamutuk rihun $100 ba sekretariadu tékniku Asosiasaun Nasaun Sudeste Aziátiku (ASEAN, sigla inglés) iha Jakarta, Indonézia.
“Ho ida-ne’e Konsellu Ministru delibera ona hodi fó kontribuisaun ho valór osan rihun $100,” Ministru Prezidénsia Konsellu Ministru, Agio Pereira, hateten hafoin reuniaun ezekutivu, iha Palásiu Governu, kuarta ne’e.
Kontribuisaun ne’e ho intensaun ba despeza administrativa iha ámbitu servisu tékniku sira iha sekretariadu ne’ebé lokaliza iha Jakarta.
Antes ne’e, Sekretariadu ASEAN kapasita ofisiál liña ministeriál iha pilár ekonómiku, sosiál, polítika no kulturál.
Notísia relevante : Sekretariadu ASEAN kapasita ofisiál liña ministeriál sira iha pilár ekonómiku
Aleinde ne’e, Governu Timor-Leste liuhosi kooperasaun ho Indonézia, haruka funsionáriu hosi liña ministeriál bá Jakarta hodi halo preparasaun téknika sira hodi apreende sistema no lala’ok servisu tékniku ASEAN, hanesan meiu ida fó koñesimentu ba Timor-Leste atu adere ba asosiasaun.
Timor-Leste hato’o pedidu adezaun ba ASEAN hahú hosi tinan 2011, nune’e daudaun ne’e hanesan membru observadór.
Iha parte seluk, Munistériu Negósiu Estranjeiru no Kooperasaun kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun. Nune’e mós halo elaborasaun dokumentu rejime komérsiu externu no enkuadramentu legál sira.
ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.
Maski Timor-Leste daudaun ne’e seidauk sai membru plenu direitu ASEAN, maibé partisipa ona eventu nivel altu asosiasaun ho nasaun membru sira seluk.
Jornalista : Antónia Gusmão
Editora : Julia Chatarina
