OÉ-CUSSE, 25 agostu 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), aloka $510,516.73 hosi Orsamentu Jerál Estadu (OJE) 2023 hodi konstrui postu integradu fronteira Oésilo no rezidénsia ba pesoál Alfándega.
“Rezultadu aprovizionamentu anúnsia ona, kompañia Lifau Indah mak sei halo, ita hakarak halo tanba iha fronteira Napan, iha ona konstrusaun furak tebes hosi Indonésia nian ba sira-nia postu integradu, tan ne’e ita halo, la’ós atu di’akliu, la’ós atu kompete maibé ita mós tenki hatudu atu labele lakon ho rai sorin,” Prezidente Autoridade RAEOA, Arsénio Bano ba Tatoli iha Oé-Cusse, sesta ne’e.
Notísia relevante: Autoridade Nitibe husu Guvernu konstrui postu UPF iha Fatusobe
Arsénio Paixão Bano, informa, dezeñu tékniku sira hosi Diresaun Rejionál Infraestrutura aprezenta ba autoridade to’o dala lima mak foin aseita, tanba postu UPF ne’e atu halo tenke hatudu diferente.
Tan ne’e maka iha tinan kotuk Governu Sentrál liuhosi Ministériu Asuntu Parlamentár no Komunikasaun Sosiál halo lansamentu ba programa Naroman ba Suku, Autoridade mós konvida no observa ona konstrusaun ne’e nia fatin ba futuru atu halo ne’e oinsá.
“Tanba konstrusaun ne’e rasik autoridade promete ona iha tinan kotuk, haree ba nia kondisaun ladún dignu, entaun ita hatama iha planu asaun anúal 2023, daudaun ne’e ita prepara ona no tempu badak ita halo lansamentu,” nia fó-sai.
Razaun atu hadi’a postu sira iha fronteira Oé-Cusse, atu minimiza atividade ilegál sira, iha 2022 Autoridade harii postu integradu ida iha aldeia Kiubiselo, suku Bobometo, postu integradu Citrana mós la’o daudaun ona, no tinan ne’e halo tan ida iha Oésilo. Sei kontinua ba sub-rejiaun Pássabe, Pante Makasar no Nítibe.
Notísia relevante: Autoridade RAEOA harii postu UPF Fatubasin no reabilita estrada
Jornalista: Abílio Elo Nini
Editór: Evaristo Soares Martins
