DILI, 30 agostu 2023 (TATOLI)—Primeiru Ministru, Kay Rala Xanana Gusmão, hosi ba membru Governu ka ukun-nain sira tenke kaer ukun ho umildade no esforsu hodi serbi no defende povu nia interrese.
Notísia Relevante: Alkatiri: “Referendu riku ho rekonsiliasaun maibé ita ho ita la rekonsilia malu”
Xefe Governu hato’o kestaun ne’e iha komemorasaun loron konsulta populár ba dala-24 (30 agostu 1999-30 agostu 2023) tanba lron espesiál ida-ne’e mak povu hili ukun rasik aan iha 30 agostu 1999 iha momentu ema sunu sunu uma, terus, no timoroan lubuk ida mate.
“Tanba ne’e, ohin loron kaer ukun ho umildade, kaer ukun ho esforsu, kaer ukun ho korajen atu serbi no defende povu nia interrese. Tanba ne’e, iha Maromak nia uma kreda, ita husu hela Maromak nia bensaun ba ita hotu ne’ebé hatudu ona ita-nia kompromisiu ba rai ida-ne’e, serbi di’ak ba. Tulun ami atu servisu ho di’ak hodi fó onra ba sira-ne’ebé fó sira-nia sakrifisiu ho raan no mate ba rai ida-ne’e,” Kay Rala Xanana Gusmão hato’o mensajen ho matan-been, hafoin misa agradesimentu ba komemorasaun loron konsulta populár 30 agostu 2023, iha igreja Balide, Dili, kuarta ne’e.
Líder nasionál ne’e hatutan, hotu-hotu agradese ba Maromak tanba loron ohin ne’e fó lembra ba ema hotu tanba tinan hirak liubá, povu Timor-Leste korajen tebes no korajen tebes hasoru problema, dazafiu, mate, kanek, terus ba vota hodi Timor-Leste ukun-aan.
Tanba ne’e, membru Governu, membru Parlamentu Nasionál, labele sente boot ona maibé sente de’it katak kna’ar ida-ne’e hetan hosi na’in Maromak ho nia povu.
“Nune’e saida de’it mak ita bele halo mak tenke haree malu ho di’ak. Husu deskulpa no sai servidór mak husu tulun ba Maromak. No, ita agradese ba Maromak, karik ita halo buat di’ak. Husu deskulpa, karik ita haluha no loko-aan ho ita-nia dever no kna’ar ba povu,” Xanana Gusmão hateten.
Nune’e, Primeiru-Ministru husu atu nafatin ho kna’ar ne’ebé umilde no transparánsia iha rai doben Timor-Leste.
“Objetivu rua, ida mak husu ba Maromak no povu atu perdua ami-nia sala no seluk mak husu ba Maromak atu husu grasa no tulun ba ami-nia kna’ar ho umildade, ho tranparansia, rona ba-malu, liuliu ho domin ba rai no povu ida-ne’e,” Xanana dehan.
Notísia Relevante: Mail: “DSMTT Maliana sensibiliza inan-aman vota ba independénsia iha 03h00 dadeersan”
Jornalista : Osória Marques
Editór : Cancio Ximenes
