ERMERA, 11 setembru 2023 (TATOLI)–Sekretaria Estadu Kooperativa (SEKoop), segunda ne’e, hahú elabora planu importante tolu hanesan Planu Estratéjiku tinan 2023-2030, Planu Anuál tinan 2023-2028, no Planu Finansiál tinan 2024.
Vise Primeiru-Ministru Asuntu Ekonómiku no Ministru Turizmu no Ambiente, Francisco Kalbuadi Lay, konsidera planu tolu ne’e importante tebes tanba atu atinje meta ida tenke bazeia ba planu di’ak ida.
“Hakarak kongratula Sekretáriu Estadu Kooperativa ho ekipa tomak. Elaborasaun planu sira ne’e nu’udar kompromisu durante loron-120 nian. Durante semana ida nia laran funsionáriu, dirijente no konsultór ne’ebé mai hosi Indonézia, espera iha hanoin pozitivu, efisiénsia, efikásia hodi hamosu planu di’ak,” Ministru Kalbuadi hateten bainhira halo abertura atividade iha salaun National Cooperative Business Association (NCBA), iha postu administrativu Railaco, munisípiu Ermera, segunda ne’e.
Bazeia ba orientasaun Primeiru-Ministru, Xanana Gusmão, katak programa Governu importante liu maka ekonomia.
“Ekonomia sai foku prinsipál iha mundu daudaun. Tanba ita ko’alia kona-ba sustentabilidade ekonómiku, dijitalizasaun ekonomia iha ita-nia rai ita foku liu ba ekonomia kiik no médiu, ne’ebé liuhosi kooperativa husu atu servisu hamutuk. Elaborasaun planu sira bainhira ho envolvimentu responsável kooperativa sira hosi munisípiu ne’e di’ak tebes tanba setór privadu la’o di’ak nasaun ne’e sai forte,” Kalbuadi apresia.
Notísia relevante : SEKoop prioriza programa kooperativa agríkola
Iha biban hanesan, Sekretáriu Estadu Kooperativa, Arsénio Pereira da Silva, konsidera iha instituisaun Estadu ida ka organizasaun ruma atu atinje buat ruma presiza iha planu estratéjiku di’ak.
“Klaru katak programa define ona maibé husu atu ami tenke halo planu estratéjiku di’ak para depois ajusta hamutuk ho programa tinan-liman, no haree ida ne’ebé mak prioridade iha tinan dahuluk to’o tinan-lima, iha ne’e ami halo kedas ho planu asaun anuál, klaru katak iha planu asaun anuál 2024 tenke prepara molok realiza panorama orsamentál to’o iha revizaun,” nia akresenta.
Planu asaun anuál sei aprezenta iha ámbitu jornada orsamentál no Komité Revizaun Orsamentu tinan 2024 nian.
“Durante semana ida ami sei haree estratejia saida de’it ba programa tinan-lima ne’ebé aprova ona iha Parlamentu, depois deside prioridade tinan 2024 no tinan sira tuir mai. Nune’e to’o fim mandatu ami bele iha sasukat ida hodi sukat katak impaktu hosi programa no atividade sira ne’ebé iha, liu-liu impaktu sosiál no ekonómika ba povu para ita iha klareza ba kresimentu ekonómiku,” governante ne’e esplika.
Planu estratéjuku SEKoop ajusta ho Planu Estratéjiku Dezenvolvimentu Nasionál (PEDN 2011-2030), tanba ne’e planu estratéjiku ne’e hosi tinan 2023 to’o 2030.
Governante ne’e enkoraja partisipante, liu-liu funsionáriu SEKoop tenke pro-ativu, matenek no hanoin saida mak iha tenke tau hamutuk hodi kontribui no halo planu di’ak hodi atinje meta sira ne’ebé planeia.
Nune’e mós, Prezidente Autoridade munisípiu Ermera, Eusébio Salsinha, konsidera planu sira ne’e importante tebes hodi fó efikásia no efisiénsia hodi bele serbí sosiedade Timor-Leste, partikulár munisípiu Ermera ho ninia populasaun a’as tebes hamutuk 138.000.
“Kooperativa presiza intensifika atu nune’e ita bele halo ekilbru ida atubele hadi’a ita-nia prosesu ekonomia hodi sensibiliza populasaun iha área rurál atu intende katak papel kooperativa ne’e saida,” nia tenik.
Elaborasaun planu importante tolu ne’e hala’o durante semana ida, hahú hosi loron 11 to’o 16 setembru 2023, ne’ebé partisipa hosi kargu diresaun no funsionáriu SEKoop hosi munisípiu hotu, reprezentante movimentu kooperativa hosi munisípiu hotu, reprezentante movimentu kooperativa. Fasilitadór mai hosi konsultór internasionál no nasionál ne’ebé mak sei fasilita durante diskusaun no elaborasaun ba planu sira ne’e.
Iha abertura ne’e partisipa hosi Vise Primeiru-Ministru, Ministru Komérsiu no Indústria Filipus Ninu Pereira, Sekretáriu Estadu Peska Domingos da Conceição dos Santos, Sekretáriu Estadu Formasaun Profisionál no Empregu Rogério de Araújo Mendonça, Prezidente Autoridade Ermera no Reprezentante Komandu PNTL munisípiu Ermera.
Jornalista : Antónia Gusmão
Editora : Julia Chatarina
