DILI, 14 setembru 2023 (TATOLI)—Primeiru-Ministru, Kay Rala Xanana Gusmão, klarifika razaun deside hili Felícia Claudinha Cruz Carvalho asume kargu nu’udar Vise-Ministra Finansa, substitui Helder Lopes iha mandatu IX Governu Konstitusionál.
“Ha’u hili ona Felícia Carvalho, nia uluk serbisu nanis iha área ne’e, depois mós tanba igualdade jéneru, hili tuir méritu,” Xanana hateten ba jornalista sira hafoin reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Nomeasaun ne’e liuhosi proposta hosi Primeiru-Ministru inklui ninia asina, ho númeru 095/PM-GPM/IX/2023, ne’ebé husu ba Prezidente Repúblika, José Ramos Horta, atu fó pose ba Vise-Ministra Finasa foun.
“Kona-ba pose ba Vise-Ministra Finansa, hein Prezidente Repúblika fila hosi viajen Estadu Unidu Amérika,” nia akresenta.
Notísia relevante : Helder Lopes komprometidu dezenvolve BCTL nu’udar instituisaun finanseira seguru
Iha sorin seluk, Xefe Governu kontinua apela ba membru Governu hotu atu serbisu ho di’ak no responsabilidade hodi serbí nasaun no povu.
“Ha’u hakarak repete filafali katak, ha’u ezije ba membru Governu hotu katak serbisu ho di’ak, transparénsia, responsável, no efikásia,” nia tenik.
Daudaun ne’e membru IX Governu iha na’in-47, kompostu hosi mane na’in-40 no feto na’in-hitu.
Jornalista : Antónia Gusmão
Editora : Julia Chatarina
