VIQUEQUE, 20 setembru 2023 (TATOLI)—Postu administrativu Viqueque Vila konsege loke dalan tolu liuhosi implementasaun programa mão de obra postu adiministrativu (PMOPA) ba faze daruak.
“Ami hahú implementa PMOPA faze dahuluk iha fulan-jullu, ne’ebé ramata ona no agora ami tama fali ba faze daruak. Bazeia ba prioridade kada suku, maka hakarak loke dalan. Nune’e ba faze daruak daudaun ne’e loke dalan foun tolu hodi abintante sira bele asesu tanba abitante balun dook hosi vila. Tanba ne’e, suku sira tau prioridade ba dalan tolu maka agora sira serbisu hela,” Administradór postu Viqueque Vila, Duarte Brandão Soares, informa ba Agência Tatoli, iha postu Viqueque Vila, kuarta ne’e.
Notísia relevante : Autoridade Viqueque prefere harii sentina liuhosi PMOPA
Ekipa implementa programa loke dalan suku Caraubalu bá aldeia Siralari ho naruk metru 700, Oloba ho naruk metru 500 pemasar liga ba Lugatoi metru 500. Tanba daudaun abitante hela sai ba k’nua nune’e loke dalan ba sira atu sira bele asesu.
Tipu atividade PMOPA ne’ebé implementa iha postu Viqueque Vila maka hanesan halo lutu haleu sede suku, hamos dalan, hamos semitériu no loke dalan.
Faze daruak atividade PMOPA implementa iha suku Caraubalu, Uma Ki’k, Uma-Uain Kraik, Maluru, Fatudere, Bibileo no Bahalara Uain, enkuantu suku Uaimori, Luca no Uma-Uain Leten iha hela prosesu implementasaun.
“Kada fulan implementa iha suku ida nune’e ami bele kontrola ho di’ak tanba ami susar atu halo kontrolu bainhira implementa dala-ida iha suku hotu,” nia akresenta.
Governu aloka osan rihun $100 ba implementasaun PMOPA iha postu Viqueque Vila iha tinan 2023, nune’e ezekusaun ba faze dahuluk 50% no faze daruak 50%.
Implementasaun programa ne’e iha suku 10 postu Viqueque Vila, ne’ebé toma konta hosi grupu 40, ne’ebé kada grupu envolve traballadór na’in-20 no kada loron traballadór hetan osan $5.
“Implementasaun PMOPA benefisia abitante sira hodi hetan netik osan oitoan hodi sustenta ba nesesidade loron-loron no suku laran sai moos,” Administradór tenik.
Jornalista : Vitorino Lopes da Costa
Editora : Julia Chatarina
