DILI, 03 outubru 2023 (TATOLI)—Primeiru-Ministru (PM), Kay Rala Xanana Gusmão, tersa ne’e, simu vizita hosi Embaixadór Nova Zelándia, Philip Hewitt, ne’ebé hakarak reafirma apoia bilaterál durante ne’e.
“Bainhira ko’alia ho Primeiru-Ministru, Nova Zelándia konkorda katak sei apoia Timor, aliña ho prioridade Governu nian. Tanba ne’e Primeiru-Ministru relata prioridade sira mai ami, ne’ebé molok estabelese apoia sira ne’e, ami sei koordena ho membru Governu relevante sira,” Embaixadór hateten hafoin hasoru malu ho Xefe Governu, iha Palásiu Governu.
Notísia relevante : MNEK-Nova Zelándia diskute kooperasaun iha área turizmu-alterasaun klimátika
Nova Zelándia hahú tinan 2016 to’o 2020, apoia ona orsamentu ba implementasaun programa iha setór oin-oin iha Timor-Leste hanesan iha setór agrikultura millaun $14,4, peska miliaun $6, edukasaun millaun $13,9, justisa no seguransa millaun $14.
“Ami apoia ona Timor-Leste iha área edukasaun hanesan fó bolsa estudu, diversifikasaun ekonomia, iha área agrikultura apoia ona Kooperativa Kafé Timor (CCT, sigla portugés) ba produtu hanesan baunila, kakau, no cenke, nomós área sira seluk,” nia akresenta.
Aleinde ne’e, Nova Zelándia liuhosi The Asia Fundation apoia Timor iha dezenvolvimentu setór turizmu, hanesan kapasitasaun ba joven sira dezenvolve sítiu turístiku sira iha munisípiu.
“Ami komprometidu nafatin apoia iha prosesu dezenvolvimentu Timor-Leste nian,” nia tenik.
Jornalista : Antónia Gusmão
Editora : Julia Chatarina
