DILI, 03 outubru 2023 (TATOLI) – La’o ho distánsia kilómetru rua hodi bele asesu ba edukasaun, alunu sira iha aldeia Ilabote, suku Goulolo, munisípiu Ermera, husu Ministériu Edukasaun (ME) atu harii eskola ida ba sira.
Reponde ba ezijénsia ne’e, Ministra Edukasaun, Dulce de Jesus, orienta ona ekipa husi ministériu hodi halo observasaun no rekolla dadus, iha semana kotuk, iha fatin refere antes deside hodi loke eskola.
Governante ne’e dehan situasaun sira hanesan iha Goulolo ne’ebé estudante sira hato’o ba ministériu presiza konstrui eskola foun ne’e la’ós problema ida ne’ebé foin akontese, maibé barak loos iha territóriu.
Ba ezijénsia alunu sira ne’e ministériu tau iha konsiderasaun katak bainhira atu harii eskola ida iha ne’ebá presiza identifika ho didi’ak, nune’e ministériu foti desizaun ruma hodi harii eskola ne’ebé bele benefisia labarik barak.
“Ezijénsia sira hanesan ne’e ita labele simu de’it hodi harii ona eskola. Ita presiza halo identifikasaun uluk, seraké Goulolo ne’e tama duni kategoria bele harii eskola ka la’e”, ministra kestiona.
Nia dehan Governu iha obrigasaun atu loke duni eskola iha territóriu atu tulun povu nia oan sira bele hetan edukasaun ida adekuadu, maibé “labele lori eskola halai tuir fali estudante sira ho númeru ne’ebé ki’ik, tanba ne’e polítika ida ladi’ak no sei estraga osan de’it”, afirma.
“Governu tenke haree didi’ak. Atu harii de’it eskola ba labarik primeiru to’o kuatru anu ne’e laiha buat ida, tanba labarik na’in-20 de’it bele iha profesór rua atu apoia. Maibé, ezijénsia labarik sira-nian atu harii eskola ba estudante kintu anu ba leten. Ne’e labele, tanba presiza halo planu ida di’ak”, dehan.
Tanba atu loke eskola ba estudante kintu anu ba leten tenke presiza profesór na’in-12, tenke iha edifísiu ida, iha osan ba merenda eskolár no konsensaun eskolár, tenke iha mós dirijente sira. “Atu harii eskola ne’e fásil, maibé atu garante nia funsionamentu ne’e maka la fásil”, realsa.
Ho kestaun ne’e, Dulce de Jesus promote katak sei bá vizita Goulolo, iha semana oin, atu tuur hamutuk ho inan-aman no komunidade sira hodi rona sira-nian hanoin.
“Ha’u mós seidauk hanoin atu halo eskola iha Goulolo tanba sedu liu mai ha’u. Ha’u mós presiza simu lai informasaun husi ekipa ne’ebé ha’u haruka ona ne’e maka sei foti desizaun”, dehan.
Ba problema sira hanesan ne’e, governante konsidera tebes tanba bele fó hanoin ida ba Ministériu Edukasaun, liuliu iha mandatu Governu Dasiak atu tau atensaun ba dezenvolvimentu edukasaun iha Timor-Leste.
Jornalista: Tomé Amado
Editora: Maria Auxiliadora
