OÉ-CUSSE, 05 outubru 2023 (TATOLI – Prezidente Autoridade Rejiaun Administrativa Espesiál Oé-Cusse (RAEOA), Arsénio Paixão Bano, hateten, populasaun iha Oé-Cusse ho pursentu 97 asesu ona liña elétrika no kobre ona iha nível aldeia to’o bairru.
“Eletrisidade, ha’u orgullu, tanba iha Oé-Cusse ne’e di’ak, parese di’akliu Dili, tanba kuaze 95% to’o 97% ne’e populasaun hotu-hotu maioria suku-hotu asesu ona, iha aldeia 63 hotu-hotu asesu eletrisidade, hela 3% ne’e, tanba komunidade balu hela dook hosi sistema liña distribuisaun,” Arsénio Paixão Bano, ko’alia iha intervista eskluziva iha estúdiu Agência Tatoli, Dili, kuarta ne’e.
Notísia relavante: RAEOA prevee millaun $1,2 kompleta liña eletrisidade
Nia klarifika, kona-bá kauza ahi mate lakan iha setembru ne’e, tanba konstrusaun estrada nasionál rua, hosi Pante Makasar ba Nítibe no hosi Pante liga ba Oésilo, kompañia hala’o hela servisu estrada foun presiza muda poste balu, nune’e afeta ba eletrisidade mate tanba kompañia halo hela kontrusaun.
“Maibé jerálmente eletrisidade iha Oé-Cusse ne’e di’ak, ba oin ita sei halo kombinasaun ho solár panél, atu hamenus kustu operasionál ba kombustível,” nia afirma.
Tuir nia, sentrál elétrika ne’ebé konstrui iha Sakatu dezde 2016 iha mandatu Prezidente Autoridade RAEOA dahuluk, Mari Alkatiri no Primeiru Ministru Kay Rala Xaanana Gusmão, mak deside instala ho kapasidade 17 MW, maibé neste mumentu foin mak uza de’it 7 MW maioria seidauk uza, maibé nível populasaun hotu-hotu asesu.
“Ha’u-nia mandatu ne’e, kada tinan iha hasai osan besik millaun $5 ba kombustível, sei iha inisiativa foun liga distribuisaun ba fatin balu mak seidauk iha, ha’u-nia mandatu gasta besik millaun $2-resin, ne’e ba bairru la’ós ba aldeia, tanba aldeia iha hotu ona, ba bairru ne’ebé maka seidauk iha, hanesan iha Nítibe suku Usitako balu iha Oésilo suku Bobometo inklui iha Pante Makasar Kutete,” nia katak.
Nia dehan, tuir loloos eletrisidade iha Oé-Cusse presiza kontinuasaun ba manutensaun nune’e hotu-hotu bele kontribui ba kofre Estadu.
“Setór ida-ne’e, só presiza halo reforsu de’it, atu ema hotu bele hetan kontadór atu selu, atu reforsu de’it ba sistema atu selu, hamenus ligasaun ilegál sira, ida-ne’e maka ita presiza halo,” nia katak.
Entretantu, tuir dadús ne’ebé Agência Tatoli asesu iha Departamentu Eletrisidade Timor-Leste (EDTL) Oé-Cusse hodi 3% ne’e, korresponde ba populasaun uma-kain 216 mak seidauk asesu tanba hela dook hodi sitema rede distribuisaun.
Notísia relevante: RAEOA aloka millaun $1-resin instala liña eletrisidade iha sub-rejiaun haat
Jornalista: Abílio Elo Nini
Editór: Evaristo Soares Martins
