BAUCAU, 06 outubru 2023 (TATOLI) – Governu fó sai ona desizaun fó subsídiu ba kompañia inportadór foos nune’e tuir planu semana-oin sei halo intervensaun folin foos iha merkadu.
Ministru Komérsiu no Indústria, Filipus Nino Perreira, esplika, planu subsídiu hodi halo intervensaun foos importasaun nian finaliza ona horisehik loron-kinta, 05 outubru liuhosi enkontru hamutuk entre Ministru Koordenadór Asuntu Ekonómiku (MKAE) ho empreza inportadór sira.
“Espera katak semana-oin ita bele ona iha pagamentu ba empreza sira-ne’e, kaundu iha ona pagamentu signifika sira hahú faan ona foos ho presu $12,”
Nune’e kada emprezáriu sei aprezenta totál estoke, importa hosi nasaun ne’ebé inklui lista marka foos liuliu iha loja distribui ba hodi aprezenta ba governu hodi halo kontratu bazea ba kilograma.
Governu preve orsamentu hamutuk millaun $4 hodi subsídia ba kompañia importandór sira hamutuk haat kompostu kompañia Lisun,lda, Perisos,lda, Alfa Dili no Kreatif,lda.
Antes ne’e, governu deside atu halo intervensaun fós iha merkadu liuhosi fós lokál iha Sentru Lojistika Nasionál (CLN, sigla Portugés) hanesan kilograma 20 ninia presu $12 ne’ebé tuir planu distribui ba munisípiu hotu iha territóriu nasionál.
Tuir observasaun TATOLI iha terenu, folin foos importasaun kontinua sa’e iha munisípiu Baucau hanesan kilograma 20 ho folin hosi $17,50 to’o 18,25, kilograma 25 ho folin entre $20 resin bazea ba markasaun.
Jornalista : Natalino Belo
Editór : Evaristo Saores Martins
