BAUCAU, 09 outubru 2023 (TATOLI) – Preparasaun realizasaun eleisaun suku iha Autoridade Administrasaun Munisipál Baucau atinje ona 75%.
Sekretáriu administrasaun munisipál Baucau, Simão dos Santos Marques Pinhero, esplika, eleisaun suku ho karaterístika hanesan eleisaun komunitária ne’ebé responsável direita hosi autoridade munisípiu tanba diferensa ho eleisaun órgaun estadu.
“Preparasaun ita atinje ona pursentu 75, serbisu hotu ne’ebé todan mak estabelesementu meza asemblea inklui formasaun ba lideransa suku sira,” Sekretáriu Munisipál Baucau informa ba Agência TATOLI iha Vila Nova, segunda ne’e.
Durante preparasaun autoridade munisipál halo preparasaun hanesan koordena ho Sekretariadu Tékniku Administrasaun Eleitóral (STAE) nu’udar apoia tékniku no liña estruturante seluk to’o estrutura suku sira iha Baucau.
Kona-ba preparasaun tékniku ho STAE kontinua iha faze koordenasaun hanesan formasaun apoia eleisaun suku, sosialiazasaun lei númeru 09/2019 kona-bá xefe suku iha baze no formasaun konsellu suku inklui partisipa postu administrativu sira.
Ekipamentu eleisaun hanesan urna hosi nasionál distribui ona iha STAE Baucau no iha tempu besik sei kompleta liu lojístika ne’ebé sei utiliza iha eventu eleisaun komunitária tinan ne’e.
“Ita bem preparadu, espera suku hotu preparadu atu aprezenta sira-nia lista kandidatura,” Simão Pinheiro akresenta.
Tuir planu iha loron-sesta,13 outubru sei estabelese meza asembleia ho simu rejistrasaun kandidatura xefe suku hamutuk 59 no iha loron eleisaun kontinua simu kandidatura xefe aldeia hamutuk na’in-281.
Notísia relevante: Suku foun tolu iha Baucau seidauk partisipa eleisaun suku
Jornalista : Natalino Belo
Editór : Evaristo Soares Martins
