DILI, 10 outubru 2023 (TATOLI) – Delegada foun jornalista Ajénsia Notísia Lusa sei substitui delegadu sesante António Sampaio hodi halo misaun jornalizmu iha Timor-Leste.
Vizita Prezidente Konsellu Ajénsia Notísia Lusa, Joaquim Carreia akompaña hosi António Sampaio ho Marisa Serafim ne’ebé hasoru malu ho Prezidente Repúblika, José Ramos Horta ne’e marka tranzisaun signifikativu tanba Sampaio ne’ebé servisu hanesan delegadu Lusa ba Timor-Leste durante tinan naruk, sei troka hosi Maria Serafim, hahú hosi 01 novembru.
Durante nia vizita iha Timor-Leste, Carreira iha oportunidade diskute asuntu barak ho Sekretáriu Estadu Komunikasaun Sosiál (SEKOMS) kona-ba dezenvolvimentu media iha Timor-Leste no oinsa halo kooperasaun.
“Foku prinsipál ida maka reforsa kooperasaun entre ajénsia notísia, liuliu entre Taitoli, Ajénsia Notísias Timor-Leste no Lusa. Objetivu mak promove programa interkámbiu ho intensaun atu hadi’a kapasidade jornalista sira Timor-Leste liuhusi formasaun ne’ebé fornese husi Lusa. Inisiativa ida-ne’e espera atu sai realidade ho planu asaun ne’ebé prepara ba tinan oin”, hatete Joaquim ba jornalista sira iha Palásiu Prezidensiál, tersa ne’e.
Carreira mós rekoñese prezensa Lusa nian iha Timor-Leste hosi nia estabelesementu iha 1987 no destaka kontribuisaun boot Antonio Sampaio nian durante nia mandatu.
Nia hatutan, importánsia Portugés hanesan lian komún ne’ebé halibur nasaun sira ne’ebé koalia Portugés no fasilita mobilidade iha Europa.
Jornalista: Hortencio Sanchez
Editór : Zezito Silva
