DILI, 17 Outubru 2023 (TATOLI)– Prezidente Asosiasaun Arte Moris, Iliwato Dana Bere, informa, daudaun ne’e arte moris liuhosi nia-voluntáriu pintór sira hala’o atividade “arte luron” ka pinta parede públiku hodi fó mensajen promosaun ba dame, konserva kultura no saúde públiku iha kapitál Timor-Leste.
“Ami hamosu atividade arte luron hanesan espresaun ka komunikasaun públiku liuhosi pintura sira iha parede públiku ba kampaña ka promove dame liuliu hamosu unidade nasionál. Ita nia pintór sira mós halo pintura ho motif Tais ne’e hanesan kampanã konserva kultura, hapara violénsia no fuma iha kapitál”, Prezidente Arte Moris ne’e hateten ba Agência Tatoli, iha Aitarak-Laran-Dili.
Notísia Relevante: Ramos Horta oferese rezidénsia Metiaut temporáriamente hodi Arte Moris rai sasán
Nia afirma maiária husi pintura arte luron ne’e aprezenta kultura timor hodi fó hanoin hikas fali ba timoroan atu labele haluha nia-abut ka kultura ne’ebé mai ho dame.
Atividade arte luron ne’e, nia dehan hetan apoia husu Prezidente Repúblika, José Ramos Horta, hafoin krize 2006, atu Arte Moris halo pintura sira iha parede públiku sira iha kapitál Dili atu promove pás no estabilidade.
Alende ne’e, atividade ne’e hetan apoiu mós husi Vinod Patel liuhosi oeferse tinta no ekipamentu pintura seluk atu voluntáriu sira bele hala’o atividade ne’e.
Arte Moris mós simu konvite no hetan rendimentu husi Organizasaun Naun Governamentál Internasionál sira hanesan World Vision, Programa Nasaun Unida ba Dezenvolvimentu (UNDP) atu promove turizmu iha Oe-Cusse no organizasaun sira seluk atu halo livru ilustrasaun.
Iha fatin hanesan, Voluntáriu Asosiasaun Arte Moris, Noviano Jen Claudi, reforsa atividade arte luron durante ne’e sira halo iha parede públiku sira iha kapitál Dili, ne’ebé hetan autorizasaun husi autoridade ka parte Governu.
Arte Moris hanesan komunidade arte ne’ebé halibur artista sira, dezde 2003 to’o ohin loron. Tanba Arte Moris hanesan mós eskola la’ós formal, ne’ebé oferese espasu aprende artistiku nian ba públiku ho gratuitu durante iha sira-nia ezisténsia.
Arte Moris nian ezisténsia liuhósi eskola la’ós formal ne’e, lori hikas foinsa’e sira-ne’ebé hamahan an iha ne’e inklui públiku ba aprende hikas valór koletivu ka matenek orgániku hosi rezisténsia nian ne’ebé eziste iha rai-li’ur no rai-laran, ne’ebé prátika hosi Aswa’in FALINTIL no povu doben Timor-Leste hasoru kolonializmu no imperializmu iha Timor.
Valór koletivu no matenek orgániku hirak ne’e transforma liuhosi produsaun artistika hirak hanesan múzika, pintura, teatru, dadolin, ai-knanoik, eskultura, multimedia inklui halo re-invensaun ba instrumentu arte nian.
Notísia Relevante: MJ deside fó “loron tolu” ba grupu Arte Moris hamamuk fatin
Jornalista: Jesuína Xavier
Editór : Florencio Miranda Ximenes
