DILI, 23 outubru 2023 (TATOLI) – Ministériu Edukasaun (ME) identifika ona projetu konstrusaun eskola CAFE (Centro de Aprendizagem e Formação Escolar) rua iha munisípiu Ainaro no Liquiçá tama iha “liña mean”, tanba ninia progresu konstrusaun fízika tinan ida-resin seidauk atinje 50%.
Diretór Nasionál Dezenvolvimentu Parke Eskolár, Hélio Lopes, hatete katak projetu konstrusaun eskola CAFE tolu tama iha Fundu Infraestrutura, maibé rua seidauk hatudu ninia rezultadu finál tanba enfrenta hela problema mak iha Ainaro foin atinje 9% no Liquiçá 38%. Ba projetu CAFE Covalima la’o di’ak maske ultrapasa tempu ne’ebé determina no atinje ona 65%.
“Ita identifika ona eskola CAFE Ainaro no Liquiçá nia ezekusaun orsamentu ba projetu Fundu Infraestrutura ne’e tama iha risku mean tuir Ministériu Edukasaun nia anotasaun katak atrazu tebetebes”, Hélio Lopes dehan ba Tatoli iha Vila Verde, ohin.
Tanba ne’e, Diresaun Nasionál Infraestrutura Edukativa kontinua observa no avalia ninia ezekusaun tomak iha tinan ida ne’e no haree mós ba ezekusaun tinan oin, nune’e bele kontinua aloka tan orsamentu iha Fundu Infraestrutura ho montante millaun $1-resin.
“Karik aloka orsamentu ba tinan oin ne’e maka empreza sira la kumpre nafatin maka ministériu sei hola pozisaun hanesan na’in ba projetu hodi regula tuir situasaun kontratu ne’ebé iha. Tanba empreza Romana Junior Unip. Lda ne’ebé kaer konstrusaun Eskola CAFE Ainaro no RICS. Unip. Lda ne’ebé konstrui Eskola CAFE Liquiçá nia kontratu tinan ida-resin ona maibé sira-ninia ezekusaun atraza tebes”, afirma.
Tuir Hélio Lopes, konstrusaun eskola CAFE rua ne’e implika ba ezekusaun orsamentu, liuliu prejudika tebes estudante sira ne’ebé maka hein hela edifísiu foun ho sala aula 36 ne’ebé kada edifísiu hetan sala aula 12 atu uza hodi hala’o prosesu aprendizajen.
Ministériu aloka verba ba iha projetu tolu ne’e hamutuk millaun $2,4. Kada projetu ninia orsamentu lahanesan. Eskola CAFE Ainaro hetan alokasaun $907.735,20, Covalima $820.206,65 no Liquiçá $692.517,12.
Husi projetu konstrusaun eskola tolu ne’e, rua maka hetan ona pagamentu ho totál orsamentu $141.976,67 – ba CAFE Covalima ho montante $85.492,80, Liquiçá $56.482,87, enkuantu Ainaro seidauk halo pagamentu.
Jornalista: Tomé Amado
Editora: Maria Auxiliadora
